KUPHINDE kwabhimba uhlelo kwiKaizer Chiefs yehlulwa okwesibili kulandelana kwiDStv Diski Challenge.
Amakhosi athelwe induku ka-2-0 yiCape Town City eKapa ngeSonto. Abekade esazikhotha amanxeba kulandela ukuxetshulwa yi-Orlando Pirates emdlalweni wokuvula wesizini yeDiski ngempelasonto edlule. Ukwehlulwa kweChiefs kungenzeka ukuthi kunyomfe izinhlelo zomqeqeshi, uVela Khumalo, olimise ngesihloko elokuthi bafuna ukuwina iligi.
Njenge-Orlando Pirates, iChiefs ayikaze iyiwine iligi yeDiski kusukela yasungulwa ngo-2014. Amakhosi asagcine ngokuphakamisa iDiski Shield amahlandla amabili. Nokho impumelelo angazigqaja ngayo wukukhuphukela esikimini esikhulu kwabadlali okukhona kubona uNkosingiphile Ngcobo, Njabulo Blom, Siyabonga Ngezana, Happy Mashiane nabanye.
Ukuhluleka kweChiefs ukubuya namaphuzu kwiCity, kusho ukuthi kuvalwe ngehlahla emaqenjini aseSoweto kwiDiski kwazise alikho eliwinile. IPirates ibuyiselwe kwamhlaba ngompetha bangesizini edlule, iStellenbosch, bedlala ngokulingana eRand Stadium. Phezu kokushaya amagoli amathathu emdlalweni wokuvula neChiefs, abafana bakaJoseph "Dukuduku" Makhanya behlulekile ukushaya inethi kwiStellies engakawini emidlalweni emibili.
Elinye iqembu laseSoweto, iSwallows, libuye lilambatha eMgungundlovu kulandela ukuxetshulwa yiMaritzburg United eHarry Gwala Stadium. ISwallows bekunezinkulumo zokuthi kungenzeka ihluleke ukuhlanganisa iqembu leDiski ngenxa yokuntula inkece nokuthi ishiywe yinqwaba yabadlali ekupheleni kwesizini edlule. IZinyoni zishiywe nangumqeqeshi uSimo Dladla ojoyine uThongathi FC kwiMotsepe Foundation Championship.
Imiphumela yemidlalo yeDStv Diski Challenge:
Royal AM 2-1 Sekhukhune United; Marumo Gallants 1-0 TS Galaxy; Orlando Pirates 0-0 Stellenbosch; Maritzburg United 2-0 Swallows; Richards Bay 1-3 SuperSport United; Cape Town City 2-0 Kaizer Chiefs; Mamelodi Sundowns 0-1 Golden Arrows; AmaZulu 0-1 Chippa United.