Orlando Pirates (1) 2
JS Saoura (0) 0
I-ORLANDO Pirates izethule umthwalo ivula ngewini esigabeni samaqoqo yehlula iJS Saoura yase-Algeria, emdlalweni weCaf Confederation Cup e-Orlando Stadium, eSoweto, ngeSonto ebusuku.
Amagoli ePirates ashaywe nguHappy Jele noBandile Shandu esiwombeni ngasinye.
EZimnyama zikleliswe kuGroup B obophele ne-AL Ittihad yaseLibya neRoyal Leopards yaseSwatini. Ukunqoba umdlalo wokuvula kuzibeke esicongweni se-log kwazise i-AL Ittihad neRoyal Leopards bazoze badlale ngempelasonto emdlalweni wokuqala wamaqoqo.
Ngaphandle kwalokho, iPirates izinciphisele ingcindezi yokuxhamazelela amaphuzu emidlalweni yokugcina yesigaba samaqoqo. Amaqembu amabili azoqeda phezulu kuGroup B azodlulela kuma-quarterfinal.
EZimnyama zagcina ngo-2015, ukuhamba ibanga elide emiqhudelwaneni yeCaf ngesikhathi ifinyelela kowamanqamu weConfederation Cup, yagcina ikhale ngaphansi kwi-Etoile du Sahel yaseTunisia.
Emdlalweni wangeSonto, iSaoura iqale ngegiya eliphezulu yahlasela zibekwa. Kudingeke ukuthi unozonti we-Orlando Pirates, uSiyabonga Mpontshane, avimbe ibhola elinzima ngomzuzu wokuqala umdlalo uqalile. Nokho kube yiPirates eshaye inethi kuqala ngomzuzu wesithathu ngesikhathi uJele eqobela phakathi ibhola emuva kokuthi unozinti weSaoura elichithele ebhokisini likade lichilizwe nguGoodman Mosele kukade kuyi-free kick. Emuva kwalokhu, ibuyile iSaoura yazama igoli lokulinganisa ngokushesha kodwa yehluleka.
Esiwombeni sesibili iSaoura ibuye ngomfutho, yafaka ingcindezi kwiPirates kodwa yehluleka uma isifike phambili. Ukufuna igoli lokulinganisa kweSaoura kuyenze yavuleka emuva. Ngomzuzu ka-65, uShandu uvalele phakathi igoli lesibili lePirates emuva kwebhola eligotshwe nguDeon Hotto kwesokunxele.
Emdlalweni olandelayo, iPirates izobhekana neLamontville Golden Arrows kwiDStv Premiership ngoLwesithathu ebusuku e-Orlando Stadium. Emuva kwalokho, izolibangisa e-Algeria iyodlala neJS Saoura emdlalweni wesibili weConfederation Cup ozoba ngeSonto ngo-6 ntambama.