Orlando Pirates (1) 1
Cape Town Spurs (0) 1
I-ORLANDO Pirates iyeke ingqayizivele yethuba lokundlalela umdlalo wabakhaya neKaizer Chiefs ngoMgqibelo, e-FNB Stadium, ivuma ukubanjelwa ekhaya yiCape Town Spurs kwiDStv Premiership ngoLwesithathu e-Orlando Stadium.
Kulo mdlalo ophele imimoya isiphakeme kungu 1-1, inkundla ivulwe uRelobogile Mofokeng esiwombeni sokuqala kwalinganisa uGadiel Kamagi, kwesesibili.
Umphumela oncomekayo ubungeke ugcine ngokubeka iPirates esimweni esihle ngaphambi kowabakhaya kodwa ubuzoyikhuphula kwi-log njengoba umqeqeshi wayo, uJose Riveiro, esekuveze kaningi ukuthi sebelwela ukuqeda isizini besemhlane weMamelodi Sundowns esesicongweni se-log.
IPirates neSpurs bafike kulo mdlalo behambela phezulu kulandela amawini abo emidlalweni edlule bebheke nePolokwane City ne-TS Galaxy ngokwahlukana ngempelasonto edlule.
Bekuwumdlalo wamagqubu kwazise leli qembu laseKapa liyithole kwiPirates iwini yalo yokuqala yesizini emdlalweni obuse-Athlone Stadium, eKapa, ngonyaka odlule.
Izimpawu zamatata kuNeil Boshoff, obevimbele izivakashi bezihlohla abadlali bePirates ukuba bamshayele bekude ngemizuzu yokuqala yomdlalo.
Ngomzuzu ka-12, uMofokeng obekade eqalile ukungqongqoza uze wavulelwa eshaya ingcwenga yegoli elimshiye echaya izandla uBoshoff.
Nakuba iPirates ithole amanye amathuba okwandisa emuva kwegoli, iSpurs ibibuye iyikhumbuze ngobungozi bokuhamba phambili ngegoli elilodwa kwazise ibinabo obayo ubungozi.
Womabili la maqembu abuye ngezinguquko ekhefini lapho kwiPirates kubonakale khona uLesedi Kapinga, obese kunesikhathi engadlali kanti kwiSpurs kungene noBoitumelo Radiopane, wayo iBucs kodwa obolekiswe kuma-Urban Warriors.
Ngokuhamba komdlalo esiwombeni sesibili, iSpurs iqalile yabhukula yakhombisa nezimpawu zokuba ingozi ngejubane likaRadiopane.
Ngalesi sikhathi iPirates ibisawuphethe nokho umdlalo futhi isaqhubeka nokwakha amathuba kodwa lingavumi ukumwela kahle ibhola uTshegofatso Mabasa, oqale umdlalo ngoba kulimele u-Evidence Makgopa.
Ugcine ephunyuziwe nokho uMabasa indawo yakhe yathathwa uZakhele Lepasa, obebukwa nawumqeqeshi wakhe kwiBafana Bafana, uHugo Broos.
Ukuhlasela kweSpurs kugcine kuholele ekutheni ithole igoli lokulinganisa ngonyazi lwegoli elishaywe uKamagi osanda kusayina kuleli qembu esuka eTanzania.
Kubukeke sengathi iPirates incishwe iphenathi ngasekupheleni komdlalo okulandelwe ukucishe babambane ngezandla abaqeqeshi bezinhlangothi zombili.