YIZE umlingisi waseCaluza, eMgungundlovu, engumzalwane webandla labasindisiwe kodwa kulokhu uzokwenza okuphambene nenkolelo yakhe.
UNondumiso Jozana (28), obelingisa indawo kaNtando Shweni kwi-Durban Gen nekadokotela kuMkhokha: The Curse, uzobonakala elingisa indawo yentombazane ehunqa insangu emdlalweni ozokhonjiswa kwi-Netflix.
Kulo mdlalo osihloko sithi Umjolo, uNondumiso uzobe elingisa indawo kaZanele. Uthe uZanele intokazi enekhono lokweluleka abanye abantu besifazane abanezinkinga kwezothando ekubeni yona kuyibhedela.
“Isikhathi esiningi ngihlale ngidlala indawo yentombazane eyi-slay queen kodwa kulokhu ngizobe ngilingisa indawo engingakaze ngayidlala. Nakuba beyikhona inselelo engibhekane nayo njengoba ngiwumntwana kaNkulunkulu kodwa kube mnandi,” kusho lo mzalwane webandla i-Great Army of God. Uthe kulo mdlalo ulingisa nezingwazi ezinjengoMagic Hlatshwayo owayenguMadlanduna kukaKwakhala Nyonini, uKay Sibiya noTina Jaxa.
UNondumiso uthe uqale ukulingisa esemncane kakhulu emidlalweni kasontosikole. Uthe ikhono lakhe laze lahlonzwa nguthisha owayemfundisa esikoleni i-Russel High. Uthe uye owamcebisa ngokuthi ayofundela ukulingisa esikhungweni semfundo ephakeme.
“Emuva kokuphothula u-matric, ngabe sengenza izifundo ze-Drama and Production Studies, ngigxile emkhakheni wokuqondisa, ukulingisa nokubhala imidlalo.”
UNondumiso uthe uqale ukulingisa okokukholelwayo ngemidlalo kaGodfrey Dlamini njengoba agcina eselingisa okokuqala indawo eqavile emdlalweni owawuthi uNomthawelanga.“
Le ntokazi imatasatasa kulezi zinsuku njengoba ivela kuMkhokha nasemdlalweni okhonjiswa kwi-Showmax othi Law Love Betray.
”Kulona ngidlala indawo kaNokuthula oyi-social ifluencer edabuka emakhaya. UNokuthula uzozithola esesezinkingeni zezothando.“
Abanye ababoshelwe kulo mdlalo ngoNimrod Nkosi noPearl Modiadie. UNondumiso unamagalelo ekulingiseni kangangoba useke waqokwa emkhakheni we-Newest Find kumaKZN Entertainment Awards ngo-2020, lapho ayedlana khona imilala neBlaq Diamond, Q.Twins, Mnqobi Yazo, Sbahle, Sithelo The DJ noNtobeko Sishi kodwa kwawina uSithelo The DJ.