Maritzburg United (0) 1
Orlando Pirates (0) 0
I-ORLANDO Pirates ijabhise izinkumbi zabalandeli iwashiya womathathu amaphuzu kwiMaritzburg United emdlalweni weDStv Premiership eHarry Gwala Stadium, eMgungundlovu, ngeSonto ebusuku.
Igoli leMaritzburg lishaywe nguSoukouma Amadoh esiwombeni sesibili kuyiphenathi.
IPirates ingene enkundleni idinga amaphuzu amathathu okubuyela esicongweni se-log kulandela ukugudluzwa yiRoyal AM ngoMgqibelo ntambama. IRoyal AM ixebule iSekhukhune United ngo-2-1 kowayo umdlalo weligi.
Ngokubanjwa yiMaritzburg, iPirates yehlele endaweni yesithathu kwi-log ngamaphuzu ayishumi.
EZimnyama ziphoxe abalandeli bazo abebegcwalise inkundla iHarry Gwala phezu kokuba umdlalo ubukade ungeSonto ebusuku okuyinto engajwayelekile. Abalandeli baphume ngobuningi phezu kokuthi ngesonto eledlule bekhale ngokubiza kwamathikithi njengoba ebedayisa u-R80.
Umdlandla abangene ngawo enkundleni abalandeli beZimnyama uphenduke usizi bebuka abadlali babo behlulwa yinqwaba yamathuba. Babonakale sebeqala bephuma enkundleni ungakapheli umdlalo.
Enkundleni iPirates iqale ngegiya eliphezulu icindezela iTeam of Choice. Nokho kade ihluleka ukusebenzisa amathuba. Ngokuhamba komdlalo iMaritzburg ingenile egiyeni kodwa ihluleka ukwakha amathuba acacile okushaya amagoli. Ngomzuzu ka-30, sezithengana, kuhambe ugesi enkundleni. Kumiwe imizuzu engu-10. Emuva kwalokho umdlalo awubange usabuyela ezingeni lawo. Ngaphambi kwekhefu iTeam of Choice ithole amathuba amabili okushaya amagoli kodwa amehlula umgadli, u-Amadou.
Esiwombeni sesibili iPirates ibuye ngomfutho kodwa yehluleka ukugqobhoza udonga lwasemuva lweMaritzburg. Ngomzuzu ka-65 kusukume abalandeli ngesikhathi uZakhele Lepasa ebashiya benkemile abadlali basemuva beMaritzburg kodwa washaya ibhola laphuma eceleni kwepali esebhekene nonozinti, uKing Ndlovu.
Izinto zigcine zivune iTeam of Choice ngesikhathi ithola iphenathi ngomzuzu ka-78 emuva kokuthi isitobha sePirates, u-Olisa Ndah, siwise ebhokisini uSiboniso Conco.
Emdlalweni olandelayo iPirates izobhekana neTS Galaxy koweligi e-Orlando Stadium ngoMgqibelo. ITeam of Choice, ebinqoba okwesibili kwilgi, izokwamukela iSuperSport United eHarry Gwala ngoLwesihlanu ebusuku.