I-ORLANDO Pirates ilahle ithuba lokufaka ukushisa kwiCape Town City esesicongweni se-log yeDStv Diski Challenge ibhaxabulwa ngo 4-2 yiMamelodi Sundowns, emdlalweni obuseSoshanguve Giant Stadium, eTshwane, ngoMgqibelo.
IPirates esendaweni yesibili kwi-log yeDiski Challenge ibinethuba lokufaka ukushisa kwiCape Town City, eqhubekile nokuqhwakela esicongweni se-log ngokubhaxabula iMarumo Gallants ngo 2-0, khona eSoshanguve Giant Stadium.
Amagoli enqobe ngawo iCity kulo mdlalo avalelelwe phakathi wu-Aphelele Modolwana noLisakhanyo Mene.
Kanti koweSundowns nePirates obudle ngokushisa zijahana kuqala umdlalo uze uyophela, aweSundowns avalelwe phakathi wuJerome Karelse amabili, amanye eza noThato Matli noSipho Maluleke. Kwathi awePirates eza noNjabulo Mndebele noMahau Nkota.
Okuqaphelekile kuleli qembu leBucs elincane eliqeqeshwa wuJoseph “Dukuduku” Makhanya, wukudembesela kodonga lwasemuva lwaleli qembu yize belikwazi ukubuya ngokushesha ngemuva kokungenelwa yigoli kulo mdlalo.
Ukudembesela kodonga lwasemuva lwezikaMakhanya kufakazelwe wukungenelwa kwalo ngamagoli amabili umdlalo usuyophela, njengoba elesithathu lingene ngomzuzu ka-74, kwathi elesine langena ngomzuzu ka-93 wesikhathi ebesesengezwe ngunompempe.
Nokho umphumela walo mdlalo awukayisusi iBucs endaweni yesibili kwi-log njengoba inamaphuzu angu-27 ngemuva kweCity esendaweni yokuqala ngangu-32.
Kanti iDowns ukunqoba kwayo akuyisusanga endaweni yesithupha kwi-log ngamaphuzu angu-22.
Kanti iStellenbosch FC engompetha abavikela isicoco seDiski Challenge, nokumanje isendaweni yesithathu kwi-log ngemuva kwePirateas, izothola ithuba lokulwela ukufaka ukushisa kwiBucs engaphezulu kwayo njengoba izobhekana neSwallows FC, eSoshanguve Giant Stadium, ngeSonto ngo-10 ekuseni.
Imiphumela yeDStv Diski Challenge:
Marumo Gallants 0-2 Cape Town City; Royal AM 1-2 Maritzburg United; TS Galaxy 0-0 Golden Arrows; Sekhukhune United 0-0 AmaZulu; Mamelodi Sundowns 4-2 Orlando Pirates
NgeSonto:
Swallows FC v Stellenbosch (Soshanguve Giant Stadium, 10am); Richards Bay FC v Chippa United (Mpumalanga Stadium, 12pm); Supersport United v Kaizer Chiefs (Soshanguve Giant Stadium, 12.30pm)