UHLOSE ukushaya izinyoni ezimbili ngetshe elilodwa ngohambo lwaseSpain umqeqeshi we-Orlando Pirates, uJose Riveiro.
IPirates esinezinsuku iyiqalile ikhempu yayo yaseSpain, izozibula eyokuzwana amandla ngomdlalo onzima nePlymouth Argyle egijima kwiChampionship yase-England.
I-Argyle ezobe iqala ukulolongwa uWayne Rooney wodumo kwiManchester United, izongcwekisana nezikaRiveiro namuhla ngo-7 ebusuku eBanaus Football Center, eMarbella. NgoMsombuluko, iPirates izozwana amandla neSevilla yaseSpain eJosé Ramón Cisneros Palacios, ngo-9 ebusuku. iSevilla idume umhlaba wonke ngokuwina iphindelela indebe ye-Europa League.
Ngokusho kukaRiveiro kwi-video ephanyekwe ekhasini labaxhasi bePirates iSuperSports BET, kuningi akuhlose ngalolu hambo osekungolwesibili amasizini elandelana.
IPirates inomlando wokuqala isizini ngenothi eliphansi bese ikhuphula izinga uma isiphakathi okuyinto ehlale igcina ngokuyikhubaza.
Lokhu kuhlale obala ngesizini edlule ngesikhathi ikhishwa iJwaneng Galaxy FC yaseBotswana kusadlalwa eyokuhlungela eyamaqoqo yeCaf Champions League. Kwenzeke okufanayo kwiDStv Premiership ngesikhathi ihlulwa yiStellenbosch emdlalwneni wokuqala wesizini ka-2023/2024.
Enkulumweni kaRiveiro odabuka eSpain, kucacile ukuthi nakuba ezimisele ngokukhangisa ngebhola laseNingizimu Afrika kwelakubo kodwa okuseqhulwini wukuqinisekisa ukuthi iPirates iyiqala ngegiya eliphezulu isizini entsha yePremiership.
“Leli ithuba lethu lokugcina lokuqinisekisa ukuthi bonke ubunzima esizobhekana nabo uma sekuqala isizini entsha sibulungele ngazo zonke izindlela,” kusho uRiveiro.
“Amaqembu esizobhekana nawo azosinika ubunzima obuzosicijela zonke izingqinamba esizohlangana nazo uma sekuqala isizini.
“Kuliqinio ukuthi kusemqoka kimina ukukhangisa ngebhola laseNingizimu Afrika ezweni engidabuka kulona kodwa inhloso enkulu ngalolu hambo ukubuyela emuva singcono kunalokhu esifike siyikhona. Asizele ukuyovakasha kepha sizosebenza.
“Isizini edlule iwubufakazi bokuthi uma singalungisa amaphutha ethu esiwaziyo, kuningi okungaphezulu esingakuzuza,” kulandisa uRiveiro.
URiveiro uphinde wathola izindaba ezimnandi kulandela ukufika ekhempini komdlali wakhe omusha wase-Angola, uDelvi Miguel Viera, oteketiswa ngelikaGilberto.
Lesi siphekepheke esiqhamuka ezimpondweni esisuka kwiPetro de Luanda, sifike kamuva ekhempini yePirates kulandela ukubanjezelwa kwaso amaphepha asigunyaza ukuba se-Europe. UGilberto uzobanga ijezi nabadlali abahlukene okukhona kubona uKarim Kimvuidi, Monapule Saleng, Katlego Otladisa noRelebohile Mofokeng. EZimnyama zihlalelwe wumsebenzi wokuvikela indebe yeMTN8 neyeNedbank Cup okuyizinkomishi eseziziphakamise amasizini amabili elandelana.