UMDLALI weBanyana Banyana, uJermaine Seoposenwe, useqalile ukuzilolonga neqembu lakhe elisha iMonterrey, eliyibamba esigabeni esiphezulu eMexico, iLiga MX Femenil.
USeoposenwe (29) usayine inkontileka yeminyaka emibili neMonterrey ngaphambi kokuqala kweNdebe yoMhlaba esanda kuphothulwa e-Australia naseNew Zealand, esuka kwi-FC Juarez edlala kwiligi efanayo.
Bekunovalo lokuthi angase angakwazi ukujoyina ozakwabo ngokushesha njengoba alimala esiwombeni sokuqala iBanyana ibhekene neNetherlands koweLast 16 ngo-Agasti 6.
Nokho iqembu lakhe elisha eliteketiswa ngokuthi iRayados, ngenxa yemigqa eluhlaza nemhlophe esejezini layo lasekhaya, lifake isithombe salo mdlali ezilolonga emakhasini ezinkundleni zokuxhumana, limemukela.
USeoposenwe uphendule lo myalezo ngokuthi: “Sengiqedile ukuziqeqesha okokuqala neqembu. Bekumnandi ukubuyela ekuzilolongeni ngokuphelele. Umsebenzi onzima usuyaqala manje.”
IMonterrey isendaweni yesine kwi-log ngamaphuzu angu-13 emidlalweni eyisithupha. Isinqobe imidlalo emine, yadlala ngokulingana kanye, yaphinde yahlulwa kanye.
Khonamanjalo akukho okusha okusavelile mayelana nesimo sabanye abadlali beBanyana Banyana abalimala eNdebeni yoMhlaba, okungukaputeni uRefiloe Jane nomdlali wasemuva uBambanani Mbane.
Iqembu likaJane, i-US Sassuolo, lizoqala isizini entsha yeSeria A e-Italy ngokubhekana neFiorentina maphakathi nenyanga ezayo.
Iqembu likaMbane, iMamelodi Sundowns Ladies, lamukele iningi labadlali abebeijima eNdebeni yoMhlaba njengoba lilungiselela ukubuya kweHollywoodbets Super League nomqhudelwano weCosafa wokuhlungela i-Caf Women’s Champions League.
Abadlali okukhona unozinti u-Andile Dlamini, Karabo Dhlamini, Lebogang Ramalepe, Tiisetso Makhubela noMelinda Kgadiete sebeqalile ukuzilolonga neqembu kodwa uMbane akazange abonakale kwi-video yakamuva efakwe yileli qembu emakhasini alo ezinkundleni zokuxhumana.