IKAIZER Chiefs izodlala ngaphandle kwezethenjwa kwindumezulu yeDStv Diski Challenge ezoba sePrincess Magogo Stadium, KwaMashu, kusasa nangeSonto.
Amakhosi azobhekana neRoyal AM ngeSonto ngo-12.30 emini emdlalweni obhekwe ngabomvu. Impelasonto yebhola eMagogo izovulwa yiLamontville Golden Arrows neSekhukhune United kusasa ngo-10.30 ekuseni. Emuva kwalo mdlalo kuzolandela owe-Orlando Pirates neMaritzburg United ngo-12 emini.
NgeSonto, usuku luzovulwa yiRichards Bay neMarumo Gallants ngo-10 ekuseni.
Amakhosi azotheleka eThekwini ngaphandle kwenqwaba yabadlali abajwayelekile esikimini sawo kwiDiski Challenge, okukhona kubona uMduduzi Shabalala ongomunye wabazoqala ukubhala izivivinyo zokuphela konyaka zikamatikuletsheni ngoMsombuluko.
Abanye abadlali beChiefs, okubalwa kubona uSamkelo Zwane, Aiden McCarthy no-Omega Mdaka, bayodlala eqenjini lesizwe lika-Under 23 emdlalweni womlenze wesibili wokuhlungela i-Africa Cup of Nations (Afcon) neTogo ngeSonto. Laba badlali bazojoyinwa ngumqeqeshi wabo kwiChiefs, uVela Khumalo, oyosiza kule mpi yeqembu lesizwe.
UKhumalo, oqeqesha iqembu lesizwe lika-Under 20, uyiphini lomqeqeshi, uDavid Notoane, kwelika-Under 23 elibheke ukuzibekisela indawo kuma-Olympics azoba seFrance ngo-2024. Ebhentshini leChiefs kuzohlala uDavid Mathebula noTshidiso Letsholonyane.
"Kuzofika iqembu elihluke kakhulu eThekwini. Kuzodlala abadlali abaningi abebekade beseqenjini lika-U/19 eliwine i-Engen Champ of Champs emasontweni adlule. Izivivinyo zokuphela konyaka yizona eziphazamise abanye babadlali," kusho uKhumalo.
Nokho abalandeli beChiefs baseThekwini bazothobeka izinhliziyo ukuzwa ukuthi uzobakhona uMfundo" Obrigado" Vilakazi ongenye yezintandokazi zabo.
IChiefs idinga amaphuzu okwenyuka kwi-log kwazise uKhumalo ulimise ngesihloko emasontweni adlule elokuthi bafuna ukuwina iligi yeDiski ekupheleni kwesizini. Amakhosi asendaweni yesishiyagalombili kwi-log yeDiski ngamaphuzu angu-10 emuva kwemidlalo eyisikhombisa. IRoyal AM, ejabulise wonke amaqembu kwiDiski ngesikhathi ibuyisela kwamhlaba iCape Town City ngempelasonto edlule, izongena enkundleni ibheke ukuqhubeka nomgqigqo. Isendaweni yesikhombisa kwi-log ngamaphuzu angu-10 emuva kwemidlalo eyisikhombisa.
Imidlalo yeDStv Diski Challenge:
Kusasa - Ngo-1am: Chippa United v TS Galaxy (Wolfson Stadium); Golden Arrows v Sekhukhune United (Princess Magogo Stadium).
Ngo-12pm: Orlando Pirates v Maritzburg United (Princess Magogo Stadium.
NgeSonto - Ngo-10am: Cape Town City v SuperSport United (Malta Park Sports Complex); Swallows v AmaZulu (Dobsonville Stadium); Richards Bay v Marumo Gallants (Princess Magogo Stadium).
Ngo-12pm: Stellenbosch v Mamelodi Sundowns (Idas Valley Sports Ground).
Ngo-12.30pm: Kaizer Chiefs v Royal AM (Princess Magogo Stadium).