KUZOVUKA amagqubu kwiNedbank Cup njengoba esigabeni se-Last 16 kuzohlangana amaqembu ayeqhuthana kowamanqamu alo mqhudelwano ngesizini edlule.
NgoLwesithathu ntambama aqhathiwe amaqembu awu-16 asesele kulo mqhudelwano.
IMamelodi Sundowns izovakashela iMarumo Gallants eyayinqoba ngo 2-1 esikhathini esengeziwe kowamanqamu nyakenye.
I-Orlando Pirates, esiyiphakamise kabili le ndebe, izodlalela ekhaya neqembu leMotsepe Foundation Championship, iVenda Football Academy. IKaizer Chiefs nayo izokwamukela elinye iqembu eliyibamba kwiChampionship, iCasric Stars.
Uwodwa umdlalo womkhaya ozoba khona kwiLast 16 kulandela ukuqhwathwa kwamaqembu aKwaZulu-Natal, iLamontville Golden Arrows neRoyal AM.
La maqembu asanda kududulana koweligi ngasekuqaleni kwale nyanga, kwanqoba iThwihli Thwahla ngo 2-1.
Elinye iqembu laseKZN, AmaZulu, lizodlala neDondol Stars ekuhambeni. IStars, egijima kwi-ABC Motsepe League, ikhiphe iSuperSport United ngo 2-1 kwi-Last 32.
Izinsuku nezindawo okuzodlalelwa kuzona kusazomenyezelwa yiPremier Soccer League.
Esewonke amaqembu, aqhathwe kanje kwiLast 16:
Orlando Pirates v Venda Football Academy
Lamontville Golden Arrows v Royal AM
Marumo Gallants v Mamelodi Sundowns
Chippa United v Mpheni Home Defenders
Dondol Stars v AmaZulu FC
Kaizer Chiefs v Casric Stars
Sekhukhune United v Cape Town Spurs
TS Galaxy v Stellenbosch FC