IZANDISELE amathuba okuphosa umbalane embangweni wokuvika izembe iMaritzburg United itshontsha amaphuzu kowomkhaya neLamontville Golden Arrows iyidla ngo 1-0 koweDStv Premiership ePrincess Magogo Stadium, eThekwini ngoMgqibelo ntambama.
Igoli elinyusele iMaritzburg emaphuzwini angu-20, lishaywe ngu-Ali Meza ngomzuzu ka-93.
Amabhuku omlando emidlalo phakathi kwala maqemu, aveza ukuthi abegcine ukudlala ngokulingana ngoDisemba ka-2017. Nangaleso sikhathi iMaritzburg yayicijwa nguFadlu Davids, osanda kushaya emuva kokuyoncela ulwazi kwezinye izindawo kwazise unyukele eGoli waze wajika naseRussia.
Ilanga ngesiwombe sokuqala lenze kwabukeka kulula ukuthi la maqembu aphinde ashayane aze abukane kwazise ubuze ubadabukele indlela ebekhipha ngayo inhlanzi emanzini.
Nokho bakhombisile ukuba ngabadlali abakhokhelwayo ngokubhekana naleso simo.
Nokho-ke bagcine beye ekhefini kungekho osabhakuzise inethi.
Isiwombe sesibili besilindelwe sibe ngcono kwazise nenhlamvu yelanga ibisithanda ukucasha ngamafu sekuzwakala nomoya.
Nebala i-Arrows ayichithanga sikhathi ukukhombisa ukuthi phezu kokuthi inkundla bekungeyayo, yingani ingaphezulu ukunomkhaya bayo nakwilog.
Eqinisweni sonke isiwombe sesibili kube ngese-Arrows kodwa iMaritzburg yavikelwa ngunozinti wayo ngokunjalo nenhlanhla uqobo lwayo.
Uvimbe amagoli anzima uRenaldo Leaner, ogcine eqokwa njengomdlali ovelele osukwini, kanti inhlanhla imlekelele wala ukhasha ngisho sebenikwe ifreekick ebhokisini abe-Arrows.
Kucacile nangomzuzu wokugcina ukuthi nebala inhlanhla ibitshekele ngakwiMaritzburg intshontsha amaphuzu ngonyawo lukaMeza, ohudule amadoda esuka ngasemuva kwesokunxele waze waliphosa enethini.
Kungena leli goli nje kukhona elikaGenino Palace, obesanda kushaya ipali ngebhola ebese limdlile uSifiso Mlungwana ezintini ze-Arrows.
Imidlalo yakule mpelasonto yendlalelwe ngumshophi kudlula emhlabeni ngokuzuma, obengumsizi wonompempe ngaphansi kweSouth African Football Association, uMoeketsi Molelekoa.
Lokhu kuholele ekutheni kugotshiswe amakhanda njalo uma kuqala umdlalo.
IPSL, esitatimendeni sayo ayenabanga ukuthi uMolelekoa uthathwe yini kodwa izithombe ebeziphanyekwe kwiTwitter ziveze ukuthi ulimale engozini yemoto.