IMARITZBURG United ayilahle ngemizuzu yokugcina idedela amaphuzu ngokubambana naMaZulu FC ngo 1-1 emdlalweni weDStv Premiership womkhaya baKwaZulu-Natal, eHarry Gwala Stadium, eMgugngundlovu, ngoLwesihlanu ebusuku.
IMaritzburg ebize kulo mdlalo iphuma esibhaxwini sika 1-0 ebisithole kwiChippa United ngeSonto eledlule, ivukile yazithatha yenza isiqiniseko sokuthi amaphuzu amathathu asala eMgungundlovu.
Igoli enqobe ngalo iMaritzburg kulo mdlalo lingomfelwe phakathi ngekhanda wuKwame Peprah ngomzuzu ka-32 esiwombeni sokuqala.
Kwathi elaMaZulu lavalelwa phakathi wuGully Manziba ngomzuzu ka-90, esikhathini ebesesengezwe wunompempe.
Ngesiwombe sokuqala umgadli weMaritzburg, u-Ali Meza, uthande ukuba wuhlupho ngesiwombe sokuqala ethwalisa kanzima izitobha zaMaZulu ikakhulu uma eqhamuka ngasophondweni lwesobunxele, nokho ngesiwombe sesibili esekhishwa kwangena u-Ishmael Njoti.
Yize ngesiwombe sesibili AmaZulu ekhombise ukuba yiqembu elingcono, kodwa aphikwe yinhlanhla efika efikile eMaritzburg, kwala noma esenze izinguquko ngokufaka abadlali abahlaselayo okubalwa kubo uKeagan Buchanan, uHendrick Ekstein noBongi Ntuli.
UNtuli ucishe watholela AmaZulu elokulinganisa ngomzuzu ka-82, ecezwa kancane yIbhola ebeligotshwe wuThembela Sikhakhane eqhamuka ngasophondweni lwesokudla.
Kuphinde kwaba ngesifanayo futhi leli qembu liphikwa inhlanhla ngomzuzu ka-89 ibhola ebelingqomfelwe wuJunior Dion lishaya ipali, kade kwayi-corner kick.
Nokho, uManziba obedlala umdlalo wakhe wesibili esayiniswe yileli qembu esuka kwiSupersport, ugcine etholele AmaZulu elokulinganisa ngomzuzu ka-90 ngemuva kwebhola ebeligotshwe wu-Ekstein.
Ukuthola amaphuzu aphelele kweTeam of Choice kulo mdlalo bekuzokwenza omkhulu umehluko empini yayo yokusuka esishozini sezembe njengoba ukudlala kwayo ngokulingana noSuthu kungawasusanga endaweni ka-14 kwi-log.
Kanti ngakolunye uhlangothi Usuthu olusalokhu luqhubekile nokubhala lucisha, emidlalweni eyisithupha kubuywe ekhefini leNdebe yoMhlaba Usuthu lusanqobe umdlalo owodwa kuphela lwashaywa kabili, lwadlala ngokulingana kane.
Khonamanjalo, iSwallows FC ikhombise izinhloso zokusuka esishozini sezembe ishaya iRichards Bay ngo 1-0 emdlalweni obuseDobsonville Stadium, eSoweto, ngoLwesihlanu ebusuku.
Igoli enqobe ngalo iSwallows kulo mdlalo livalelwe phakathi wuKagiso Malinga ngomzuzu ka-81.