I-MARITZBURG United isiwadinga ephelele amaphuzu emdlalweni wayo wokugcina wesizini neMamelodi Sundowns ngoLwesibili, ukuze ivike ukugawulwa yizembe kwiDStv Premiership.
IMaritzburg elwa impi enzima yokubalekela izembe ibuyise ithemba kubalandeli bayo izolo ntambama ishaya iStellenbosch FC ngo 1-0 eHarry Gwala Stadium, eMgungundlovu.
Lona beku ngomunye wemidlalo yeDStv Premiership ebibhekwe ngabomvu kule mpelasonto.
Igoli enqobe ngalo iMaritzburg kulo mdlalo livalelwe phakathi wu-Amadou Soukouna ngesiwombe sokuqala sekusele imizuzu embalwa ziye ekhefini.
Yize iMaritzburg iwunqobile lo mdlalo ebinganikwe thuba kuwo, kodwa lokho akukayisusi emsileni we-log phezu kokuba iChippa United ebanga nayo izembe ixetshulwe ngo 4-0 yi-TS Galaxy komunye umdlalo wempi yezembe obubhekiwe khona izolo.
Njengamanje iMaritzburg ibambene ngamaphuzu angu-29 ngokulinganayo neChippa kanye neMarumo Gallants evika nabo izembe, kodwa okuyenza ihlale emsileni wumehluko wamagoli.
Lokhu sekusho ukuthi iTeam of Choice kuzofanele nakanjani ibuye namaphuzu aphele emdlalweni wayo neSundowns, eLoftus Versfeld Stadium, eTshwane, ngoLwesibili ngo-7.30 ebusuku, ukuze ikwazi ukuphepha ezembeni, bese iphinda ithandazela ukuthi iChippa neGallants banganqobi emidlalweni yabo yokugcina ngoMgqibelo ozayo.
IChippa izodlala neLamontville Golden Arrows, kuthi iGallants ibhekane neSwallows ngawo uMgqibelo.
Empeleni abadlali baleli qembu laseMphithi kufanele bazisole bona ngokubhacaza kwabo ngisho nasemidlalweni obekufanele bayinqobe, okubalwa kuwo oweGallants abawudlala ngokulingana kungenasidingo ngeledlule kuba ngu 2-2, ekubeni kuyibona ababehamba phambili kwaze kwaba izikhawu ezimbili.
Ngakolunye uhlangothi iRichards Bay FC ijoyine amaqembu avika izembe ibhaxabulwa ngo 2-0 yiCape Town City, eCape Town Stadium, eKapa, khona izolo.
Njengamanje iRichards Bay isendaweni ka-13 kwi-log ngamaphuzu angu-32 nayo isengazithola isenkingeni uma ingawunqobi umdlalo wayo wokugcina neRoyal AM.