SIBUSISO MDLALOSE
Ebika eseHarry Gwalal Stadium
IMARITZBURG United ibuye sekuvalwe amehlo ibambana ngo 1-1 neRichards Bay FC emdlalweni womkhaya baKwaZulu-Natal kwiDStv Premiership, eHarry Gwala Stadium, eMgungundlovu, ngoLwesihlanu ebusuku.
Womabili la maqembu abewadinga ngokufanayo amaphuzu kulo mdlalo, njengoba iMaritzburg United isempini enzima yokuvika izembe.
Ngakolunye uhlangothi iRichards Bay obesekuphele imidlalo eyisishiyagalolunye ingayazi iwini, okubalwa nokushaywa imidlalo eyisikhombisa ilandelana, ibiwadinga ephelele amaphuzu kulo mdlalo.
Iphuzu elithole kulo mdlali kuyinike ukuphefumula njengoba ibisiphumile esixhantini samaqembu ayisishiyagalombili aphezulu.
Yize bezithengana ngesiwombe sokuqala futhi womabilli amaqembu ewatholile amathuba okubhakuzisa inethi, kodwa iRichards Bay iyona ekwazile ukusebenzisa ithuba ngendlela phambi kwamapali.
Lapha kungenkathi isikhwishikhwishi saleli qembu, uSanele Barns, evalela phakathi igoli ngomzuzu ka-37 emuva kwebhola abelibekelwe nguSakhile Hlongwa.
UGenino Palace ugcine elamulele iTeam of Choice ngomzuzu ka-92 wesikhathi ebesesengezwe ngunompempe kwaba ngu 1-1, kwaduma inkundla.
Yize iRich Boyz nayo beyize kulo mdlalo izinto ziyibhimbela kakhulu izinto, kucaca ukuthi ukwehluleka kwayo ukuthola amaphuzu kungayibeka endaweni engeyinhle kwi-log, phezu kokuyiqala kahle isizini.
Lo mdlao ungacishe ufaniswe nobungase ucacise ngekusasa leTeam of Choice kwiPremiership ukuba ibishayiwe njengoba kubukeka inyanda yemuka nesibopho kuleli qembu laseMgungundlovu, okuyilona elisalokhu liyibambe emsileni kwi-log yePremiership.
Njengamanje iTeam of Choice isabambe ibhuleki kwi-log ngamaphuzu angu-26 emidlalweni engu-26, Kanti iRich Boys isendaweni yesishiyagalombili ngamaphuzu angu-27 emidlalweni elinganayo