Marumo Gallants (0) 1
Young Africans (1) 2
KUFANELE izisole yona ngokuyeka amathuba iMarumo Gallants ngokuwashiswa kwayo ijezi iYoung Africans SC yaseTanzania, emdlalweni owandulela owamanqamu weCaf Confederation Cup.
IGallants ishaywe ngo 2-1 kowomlenze wesibili obuseRoyal Bafokeng Sports Palace ngoLwesithathu ebusuku obekulandela ukushaywa kwayo ngo 2-0 kowomlenze wokuqala obusekuhambeni ngesonto eledlule.
Kube wuFiston Mayele noKennedy Musonda, ababe amaqhawe ezivakashi ngamagoli kulo mdlalo oqalwe yiGallants imelwe wukuwunqoba ngamagoli amathathu ngaphandle kwempendulo. Elokubika leqembu lasekhaya lishaywe, uRanga Chivaviro.
Njengoba bekulindelekile, iGallants iyona eqale ngomfutho futhi kusobala ukuthi izimisele ngokushaya amagoli ngokushesha.
Lokhu kufakazelwe ukuthi leli qembu leDStv Premiership liqale lo mdlalo ngabagadli ababili uRanga Chivaviro noLetsie Koapeng, okuyinto engajwayelekile kulona.
Maphakathi nesiwombe sokuqala iGallants iqalile yakhombisa izimpawu zokuxhamazela phambi kwamapali ezivakashi kwazise amathuba abevela kodwa lutho ukuqhamuka kwegoli ebelidingeka.
Abevela namathuba eYoung Africans okushaya igoli ebelizobaqeda amandla abeGallants kodwa nabo bebewayeka ngendlela efanayo neyeGallants.
Ngomzuzu wokugcina wesiwombe sokuqala, u-Ayanda Nkili, obesanda kungena wenze iphutha elidalele uMayele ithuba lokushaya ingcwenga yegoli eliqede ukuzethemba kubadlali beGallants obese kudingeka amagoli amane ukuze idlulele kowamanqamu.
Kungene uMonde Mphambaniso noKatlego Otladisa, zibuya ekhefini ngenhloso yokukhuphula amathuba kodwa lokhu bekuyishiya iklayekile iGallants emuva.
Iqhubekile nokuzama (iGallants) kodwa yonke le mizamo igcine iphelela emoyeni kwaze kwaba umzuzu ka-62 lapho uMayele ebukise khona ngoTsepo Gumede, amdabule ngejubane wase ephakela uMusonda ongazange alenze iphutha.
Emuva kwaleli goli ibisaqhubeka nokuzama iGallants kodwa bese kucacile ukuthi awukho umlingo abasengawenza ngaphandle kokulinda ukuthi umdlalo usongwe.
Ligcine liqhamukile nokho igoli likaChivaviro.
IGallants sekumele ikhohlwe okwenzeke kulo mdlalo, izilungiselele omunye umdlalo omqoka ngoMgqibelo wokuvala iDStv Premiership.
Leli qembu libalwa namaqembu asengcupheni yokudliwa yizembe uma linganqobi kwiSwallows FC. IGallants ibambe unombolo-15 kwi-log ngamaphuzu awu-29. Ayalingana naweChippa United esemsileni.
Ngaphezu kwala maqembu sekuhleli iMaritzburg United enamaphuzu awu-30, yona esonge isizini ibambana ngo 1-1 neMamelodi Sundowns ngoLwesibili.