IMAMELODI Sundowns iqhathwe neCR Belouizdad yase-Algeria kuma-quarterfinal eCaf Champions League kanti iMarumo Gallants yona izobhena nePyramids SC yase-Egypt esigabeni esifanayo seCaf Confederation Cup.
Lokhu kuvele ekuqhathweni kwamaqembu okwenzeke eCairo, e-Egypt ngoLwesithathu ebusuku.
Akubuzwa ukuthi la maqembu aseNingizimu Afrika azozifica zigawulwe zabekwa kuma-quarterfinal ngenxa yokuthi, ngokwehlukana aqede isigaba samaqoqo engayazi induku futhi eqhwakele emaqoqweni awo.
KwiSundowns kulindelwe okungcono kakhulu kwazise izoya kule midlalo isivele isiqedile ngesicoco seDStv Premiership, esithathe okwesithupha kulandelana ngoMgqibelo owedlule.
KwiGallants kusashubile kwazise ibhekene nezembe ngamehlo kwiPremiership.
Sekuneminyaka lesi sigaba sikhomba ukuba wumsele ongajombeki kwiSundowns kangangoba sekuphele iminyaka eyisikhombisa igcine ukunqoba iCaf.
Okunyusa amathemba okuthi kulokhu amaBrazilians azodlula kulesi sigaba esesiphenduke ungqingetshe kuwo, ngumgqigqo akuwo kusuka kunikwe uRhulani Mokwena, isikhundla sokuhola ibhentshi.
Sekuphele imidlalo engu-22, kuyo yonke imiqhudelwano, iSundowns ingayazi induku.
Eqinisweni, ngaphansi kukaMokwena, iSundowns ayikaze yehlulwe nakakodwa.
Lokhu kuyibeka ethubeni lokuphinda izicoco ezintathu kule sizini iSundowns kwazise isekhona nasembangweni weNedbank Cup.
Aqhathwe kanje ama-quarterfinal eCCL:
JS Kabylie v Esperance; Al Ahly SC v Raja Casablanca; Simba SC v Wydad Athletic Club.
KwiConfed:
Rivers United v Young Africans; Monastir v Asec Mimosas; USM Alger v FAR Rabat.