Dondol Stars (0) 1
AmaZulu (0) 1
IDondol Stars inqobe ngo 5-4 kumaphenathi
IDONDOL Stars iphinde yawashisa iqembu elisesigabeni esiphezulu ijezi kwiNedbank Cup idla AmaZulu ngo 5-4 sekukhahlelwa amaphenathi emdlalweni weLast 16 eFNB Stadium ngoLwesithathu ebusuku.
Usuthu lugadle kuqala ngegoli likaPule Ekstein kusanda kubuywa ekhefini, uRevaldo Fox washeshe wayitholela elokulinganisa iChaba Refete, umdlalo waphela ngo 1-1.
AmaZulu abekhiphe iTornado FC ngo 3-2 kwiLast 32 kanti iDondol Stars ibisikhombisile ukuthi akumele ithathwe kancane ihlula iSuperSport United ngo 2-1 emzuliswanei wokuqala.
Umqeqeshi wamaZulu uRomain Folz akalishintshanga kakhulu iqembu kodwa bakhona abangajwayele ukuqala abafakile njengonozinti uJody February, uRally Bwalya noDumisani Zuma.
AbeDondol, uVincent Rammoni noKhuliso Rashamuse, baqhubeke neqembu abalisebenzise ngempelasonto bebhaxabula iDube Continental ngo 4-0 kowe-Safa ABC Motsepe League yaseGauteng.
Ziqale zafundana emizuzwini engu-20 yokuqala kodwa emva kwalokho womabili amaqembu abesekhombisa ukulambela igoli.
AmaZulu yiwona aqale ukulithunga kuqala athola amathuba amahle ngesikhathi uGabadinho Mhango eshaya ipali eqhamuka ngakwesokunxele ngomzuzu ka-23, u-uEkstein walibeka eceleni kabili kulandelana.
IDondol ibe isiqala ukuthumela amabhola phambili kodwa uSeema Tekiso walibhekisa eceleni ishodi lakhe ngomzuzu ka-25, noTebogo Makungo wenza okufanayo ngoka-35.
Ithuba elihle lokugcina esiwombeni sokuqala litholwe wuSuthu ngesikhathi uRamahlwe Mphahlele eligobela uMhango ebhokisini, kulokhu lo mgadli ulingqofele phezu kwepali. UMhango uyena ovinjelwe iphenathi egcine idlisa Usuthu.
U-Ekstein ugcine elibeke enethini ngomzuzu ka-54 ngemva kokuthi elibekelwe nguBwalya ngakwesokunxele.
Nokho akuthathanga sikhathi ukuthi iDondol ibuye njengoba ithole elokulinganosa ngomzuzu ka-60. UFebruary uchithe ibhola ebelingqofwe wuFox kulandela ikhona, laphinde lawela kuyena lo mdlali walivalela phakathi.
Kwale kancane ukuthi uSuthu luphinde luhambe phambili sekusele amanenjana umdlalo uphele nge-freekick ka-Abbubaker Mobara, kodwa waphinde wasebenza unozinti weDondol, umdlalo wadlulela esikhathini esengeziwe.
EzikaFolz ziwuqede umdlalo zingasaphelele ngenxa yokuthi uKeagan Buchanan ukhishwe ngekhadi elibomvu esiwombeni sesibili eseikhathinie esengeziwe.
Sekukhahlelwa amaphenathi uMhango uyishwebile eyokuqala, iDondol yawabeka phakathi wonke yanqoba ngo 5-4. IDondol isijoyine iMamelodi Sundowns emaqenjini asedlulele kuma-quarterfinal.