Lamontville Golden Arrows 0-2 Kaizer Chiefs
IKAIZER Chiefs iqinisekise ukuthi abalandeli bayo 'bangena ngevosho' ku-2023 iguqisa ngo 2-0 iLamontville Golden Arrows emdlalweni weDStv Premiership eMoses Mabhida Stadium, eThekwini ntambama ngoDisemba 31
IChiefs igiye ngamagoli kaBonfils Bimenyimana ngomzuzu ka-14 no-Edmilson Dove ngomzuzu ngoka-37.
Amaphuzu amathathu awagcinanga nje ngokuqinisekisa ukuwelela enyakeni omusha ngenjabulo kwabalandeli beMpofana kodwa ayinyusele nasendaweni yesine.
Ezika-Arthur Zwane endaweni yesine, zibambene neSuperSport United emaphuzwini angu-24.
I‐Arrows iqede umdlalo ingasaphelele, uSiyabonga Khumalo ephuma ngekhadi elibomvu ngomzuzu ka-94.
UKhumalo uthole amakhadi amabili aphuzi ngenxa yokuphiliswa lubhojozi nguKgaogelo Sekgota, obebuye abashayise ingoma abadlali basemuva beChiefs.
Bekungumdlalo wokuqala weChiefs kusukela ishiywe yinjini yeBafana Bafana, uNjabulo Blom, osanda kusayina kwiSaint Louis edlala kwiMajor League Soccer e-USA.
Izolo bekungokokuqala ebholeni laseNingizimu Afrika ukuthi kudlalwe ibhola elikhokhelayo ngoDisemba 31.
Lolu suku ludume ngemibhiyozo ehambisana nokuhabula mawala ezinkambeni zikaFaro.
Nokho-ke, iqiniso wukuthi vele nasemazweni abadlali bakuleli abafisa ukuyodlala khona, kuyisiko ukudlala ngezinsuku zamaholidi kaDisemba nakancibijane.
IChiefs iqede umdlalo wangoLwesihlanu yabamba indiza ebuyela eGoli kodwa mancane amathuba okuthi bebesayojuxuza abadlali kwazise kuyadlalwa ngoLwesibili nangoLwesithathu.
Nokho-ke, iChiefs ne-Arrows badlala ngoLwesihlanu nangoMgqibelo.