Kaizer Chiefs (0) 0
Chippa United (0) 0
BABUYELE emakhaya bechaya izandla abalandeli beKaizer Chiefs kulandela ukucazelana kwayo ngamaphuzu neChippa United emdlalweni wayo wokuqala weDStv Premiership ngeSonto ntambama, eMoses Mabhida Stadium, eThekwini.
Amakhosi afike kulo mdlalo engayazi iwini emidlalweni yayo yobungani kodwa obekusobala ukugqoza kwamagoli kule midlalo ehlulwe kuyona iYoung Africans yaseTanzania naseTownship Rollers yaseBotswana.
Yize umqeqeshi wayo, uMolefi Ntseki, ezidedele zonke izinduku ezintsha kodwa abalandeli abebephume ngobuningi babo babuyele emakhaya bengazange bawabone amagoli abebewazele enkundleni.
Imizuzu yokuqala engu-15 idlalwe yaze yaphela kungakacaci ukuthi kula maqembu womabili, ilona liphi elinezinhloso zokuvula ngamaphuzu amathathu. Onozinti ezinhlangothi zombili bebengakavimbi lutho oluza ngakubona.
Ithuba lokuqala elinyakazise abalandeli beChiefs, livele ngonyawo lukaMduduzi Shabalala kodwa walibeka eceleni kwepali kade ephumile ezintini unozinti weChippa, uStanley Nwabali.
Kulo mdlalo iChiefs ibophele okokuqala umgadli wayo omusha, uRanga Chivaviro, okuke kwavela ukuthi usayine inkontileka yesibambiso neRichards Bay FC. UChivaviro osuka kwiMarumo Gallants lapho ebeqhulula khona amagoli ngesizini edlule, ubengazange adlale kweyobungani. UNtseki waveza ukuthi ufike eqenjini engekho qatha ngokwanele.
Zombili iziwombe beziphazamiseka kaningi ngenxa yokulimala kwabadlali nhlangothi zombili obekushiya imibuzo ngokuthi la maqembu ebenzani ngesikhathi amanye amaqembu ezicijela ukuqala kwesizini entsha.
Okunye okusheshe kwaqapheleka ukuthi umdlalo ubugxile maphakathi nenkundla lapho bezishukana khona kubadlali abafana noGoodman Mosele, weChippa, noYusuf Maart weChiefs.
Nakuba ibhola belimthola njalo, uCristian Salie obegadlela Amakhosi, ubegcina ephuciwe okuyinto ebisikhombisa izimpawo zokubanenga abalandeli beChiefs.
Yize bekuthiwe ulimele kodwa umqeqeshi weChiefs uphoqelekile ukufaka, u-Ashley du Preez, othathe indawo kaShabalala.
Ngalesi sikhathi umdlalo ubusuya ngokuya ufudumala kodwa neChippa ibisike ifike kuvalwe amehlo ezintini zikaBrandon Petersen, okunguyena futhi obengukaputeni Chiefs.
UMduduzi Mdantsane noTebogo Potsane nabo abangabadlali abasha, balitholile ithuba lokuziveza kubalandeli beChiefs njengoba bengenele uChivaviro noNkosingiphile Ngcobo.
Umdlalo uhambe ngendlela efanayo engenaminyakazo etheni esiwombbeni sesibili kwaze kwaba uyaphela.
IChiefs isiyozilungiselela ukubhekana nompetha beligi, iMamelodi Sundowns ngoLwesithathu ngo-3 ntambama, eLucas Moripe Stadium. IChilli Boys izothatha leli phuzu izame uyokwengeza amanye uma isibhekene neTS Galaxy ngosuku olufanayo, ngo-7.30 ebusuku, eNelson Mandela Bay Stadium.