SIBUSISO MDLALOSE
Orlando Pirates (1) 4
Hungry Lions (0) 0
I-ORLANDO Pirates ibeyiqembu lesithupha ukuzibekisela indawo kuma-quarterfinal eNedbank Cup ngokuguqisa iHungry Lions emdlalweni weLast 16 obudlalelwa e-Orlando Stadium, eSoweto, ngoMgqibelo kusihlwa.
Amagoli enqobe ngawo iPirates kulo mdlalo kube ngumkhonto ogwaze ekhaya uMorena Monaheng weHungry Lions, ezama ukususa umhlola ekhaya ngesiwombe sokuqala.
Amanye amabili kube akaTshegofatso Mabasa noMannapule Saleng ngesiwombe wesibili.
Ukucindezela kwePirates ngemizuzu yokuqala komdlalo kudide udonga lweLions okuholele ekutheni uMonaheng alibhakuzise ngakubo ngomzuzu ka-21, ethi uzama ukuchiliza ibhola kuRelebohile Mofokeng obesebhekene namapali esethi uyacoboshisa.
Yize ziye ekhefini kungu 1-0 kodwa iHungry Lions ayikhombisanga ukuba yiqembu elingase lithole ngokushesha igoli lokulinganisa njengoba unozinti wePirates, uMelusi Buthelezi, engavimbanga mabhola anzima.
Ngaphambi kokuba ziye ekhefini iPirates kuphoqeleke ukuba yenze ushintsho kulimala kabi uMakhehleni Makhaula okuze kwadingeka kungene ithimba lwabosizo lokuqala elithe xaxa waphuma esethwelwe, esexhunywe nomshini wokumsiza ukuphefumula.
Indawo kaMakhaula ithathwe nguThalente Mbatha, ongene nomnyakazo omkhulu.
Ngesiwombe sesibili iPirates ibuye isithelwe ngezibonkolo njengoba uMbatha ebeke uhlaba udle wephasi kuMabasa olibhajiswe ezintanjeni ngomzuzu ka-65.
Kwabuya uSaleng ngoka-72 eshaya elesithathu, edlalelwe nguye uMabasa, ophinde wabuya ngomzuzu ka-94 wesikhathi esengezwe wunompempe eshaya elesine.
EZimnyama ezivikela isicoco sNedbank Cup zisakhombise ukungasinisi mahleza emaqenjini asezigabeni eziphansi ezisahlangane nawo kulo mqhudelwano.
Zaqala ngokunabisa ngo 6-0 iCrystal Lake edlala kwiSafa ABC Motsepe League, njengoba sezilandela ngesinye isibhaxu kwiHungry Lions edlala kwiMotsepe Foundation Championship.
Sezijoyine i-University of Pretoria, AmaZulu FC, Stellenbosch FC, Chippa United neSupersport United emzuliswaneni weLast 16.
NgeSonto kubhekwe imidlalo emibili, oweD'General neTS Galaxy, neMamelodi Sundowns neMaritzburg United.