INDLELA ohambe ngayo uSteve Komphela, kwiMamelodi Sundowns, eya kwiMoroka Swallows, yenza kulindelwe umdlalo wokugezelana amagqubu phakathi kwakhe nabalingani bakhe abesebenza nabo eChloorkop.
Isolezwe, like labika ekuqaleni kwale nyanga ukuthi uKomphela ushiye kwiSundowns engavalelisanga nakubasebenzi, kanti ubesethimbeni likaRhulani Mokwena noManqoba Mngqithi, ebelicija ompetha beligi.
Ufike kuleli qembu ngo-2020 eqashelwa esikhundleni esingajwayeleki esimbiza ngeSenior coach, okungahumusheka ngokuthi ngubhuti omdala.
Nokho maphakathi nesizini edlule, sishintshiwe isikhundla sakhe sabizwa nge-first team coach, okunike isithombe sokuthi usezoba ngumncedisi oseduze koqokwe njengenhloko, uMokwena.
Ubesakhona noMngqithi kuleyo ngxube kodwa esuswa kwesokuhola ibhentshi ngokubambisana noMokwena, wabe esebizwa nge-senior coach.
Kusukela lapho, ziqalile izinkulumo zoqhekeko phakathi kwabo kangangoba kwaze kwasabalala nezaziqinisekisa ukuthi lizokwakhiwa ngamagama amasha, ithimba labalekeleli bakaMokwena.
Nebala akuphelanga sikhathi esingakanani uMokwena esayine inkontileka entsha yeminyaka emine eyinhloko yabaqeqeshi beSundowns, uKomphela waphulukundlela walibhekisa kwiSwallows.
Iphela isizini vele uMokwena useqalile ukwenza izinguquko ngokulanda uMichael Loftman njengomqeqeshi wokukhahlelwa kwama-freekick, amakhona, namaphenathi.
Kubo lobo mnyama, kunezikhawu ngasekupheleni kwesizini edlule lapho kubonakale khona uKennedy Mweene, njengomqeqeshi wonozinti, okuyisikhundla ngokusemthethweni okungesikaWendell Robinson.
Umdlalo ozobuyisa konke lokhu, ungo-Agasti 12, lapho iSundowns izosingatha iSwallows enkundleni esazomenyezelwa kowequarterfinal yeMTN8.
Koweligi bazohlangana okokuqala ngo-Okthoba 29.
Ezindukwini zakhe uKomphela uzoya kule midlalo ehlome nango-Andile Jali, okungangatshazwa ukuthi uzofuna ukuyigcwalisela iSundowns kaMokwena.
UJali wethulwe njengomdlali weSwallows ngaphansi kukaKomphela, emuva kokuchithwa yiSundowns ngasekupheleni kwesizini.
Kuvela ukuthi washiya bengabhekani noMokwena.
Akugcini lapho, ngaphezu kukaJali, uKomphela uphethe noDumisani Zuma, okungafuniselwa ukuthi kwiSwallows unikwe ithuba lokukhombisa ukukhula.
UZuma usechithwe yiKazier Chiefs, naMaZulu esolwa ngokucwila ezinkambeni.