I-MARUMO Gallants izibeke ethubeni lokungena kuma-quarterfinal eCaf Confederation Cup ngokuguqisa i-USM Alger yase-Algeria ngo 2-0 ngoLwesithathu ntambama, emdlalweni womlenze wesibili wesigaba sokugcina samaqoqo omqhudelwano obudlalelwa eDobsonville Stadium, eSoweto.
Okwenze iGallants izibeke ethubeni elihle lokungena kuma-quarterfinal eConfederation Cup, wukuhlala kwayo esicongweni sikaGroup A walo mqhudelwano ngamaphuzu ayisishiyagalolunye emidlalweni emine, ilandelwa yi-USM esendaweni yesibili ngamaphuzu ayisikhombisa emidlalweni elinganayo, nayo edlulele emzuliswaneni olandelayo ngokwezibalo.
Amagoli enqobe ngawo iGalllants avalelwe phakathi nguLesiba Nku ngesiwombe sokuqala, elesibili leza noLetsie Koapeng ngesiwombe sesibili.
Nakuba iGallants ne-USM besazodlala imidlalo yokugcina kaGroup A, kodwa ngokwezibalo izimbangi zabo iSaint Eloi Lupopo yaseDemocratic Republic of Congo, ne-Al Akhdar yaseLibya, abasendaweni yesithathu neyesine, ngeke basabafica ngamaphuzu.
NgoMashi 19, iGallants izobe isidlalela ukugcina icala ne-Al-Akhdar, eBenghazi, eLibya, kuthi i-USM isonge nge-Eloi Lupopo, eNdola, eDRC ngosuku olufanayo.
IGallants ibibuyisa izinduku kulo mdlalo womlenze wesibili ne-USM kwazise kowomlenze wokuqala e-Algeria, yaguqa ngo 2-0.
Nokho kulo mdlalo womlenze wesibili ikhombise ukuba yiqembu elingcono kakhulu njengoba kuyiyona ebiphezulu ngomdlalo futhi yathola namathuba amaningi okubhakizsa inethi kunezimbangi zayo.
Ukuqhubeka nokwenza kahle kweMarumo kulo mqhudelwano weConfederation Cup, kubukeka kungase kube yikhubalo empini yalo enzima yokulwa nokusuka ezembeni kwiDStv Premiership, njengoba kuyilona qembu elisayibambe emsileni kwi-log yalesi sigaba.
Izobuyela emshikashikeni wokulwa nokuvika izembe ngokutholana phezulu neCape Town City ngoLwesibili oluzayo, eCape Town Stadium, eKapa.