INGENILE kwiHollywoodbets Super League, iLindelani Ladies FC, ngemva kokubhaxabula iRamatlaohe Ladies ngo 3-0, eLimpopo. Lokhu kwenze yaqeda ishobolo lamasizini amabili okwehluleka ukuzibekisela indawo kulo mqhudelwano.
Lo mdlalo bekungowandulela owamanqamu eSasol League National Championship, eDr Petrus Molemela Stadium, eBloemfontein.
ILindelani ifinyelele kowandulela owamanqamu ngo-Okthoba 19, ngokunenebula ngo 5-1 iRoyal Wizards yaseNorthern Cape, emdlalweni wokugcina wamaqoqo.
Amagoli aqinisekise ukuthi iLindelani ingena ishushuluza esigabeni seHollywoodbets Super League, avalelwe phakathi nguNomfundo Xulu ngesiwombe sokuqala, elesibili nelesithathu angena ngesiwombe sesibili evalelwa phakathi wuLungelo Msweli, noMbalenhle Nteza ngokwehlukana.
Leli qembu laseLindelani, eThekwini, eliphethwe futhi eliqeqeshwa nguNathi Vilakazi, likhuphukela kwiSuper League nje, beseliqeda ishobolo lamasizini amabili liphuma inqina kaMabuyaze, kule midlalo kazwelonke yokuhlunga amaqembu amabili akhushulelwa esigabeni esikhulu sebhola labesifazane kuleli iSuper League.
Emidlalweni kazwelonke yeSasol eyayibanjelwe eThekwini ngo-2021, iLindelani yakhala ngaphansi, kwaba ngesifanayo nangesizini edlule ka-2022 ePolokwane, eLimpopo, lapho yehlulwa kweyandulela owamanqamu, kwagcina kungene iTuks Ladies yaseGauteng, neCopperbelt Ladies yaseLimpopo.
Ukukhushulelwa kweLindelani kwiSuper League, sekusho ukwanda kwesibalo samaqembu aKwaZulu-Natal kwiSuper League, njengoba seyijoyine omkhaya bayo iDurban Ladies, neRoyal AM Ladies.
ILindelani izodlala owamanqamu namuhla ngo-3 ntambama, eDr Molemela Stadium, nozonqoba phakathi kwe-University of Fort Hare yase-Eeastern Cape, neCrouses Ladies yaseGaueteng.
Iqembu elizonqoba kowamanqamu lizokhala lemuke noR200 000, kuthi elizolala isibili lithola umthobanhliziyo kaR100 000.