Lamontville Golden Arrows (1) 1
Mamelodi Sundowns (0) 1
IPHINDE yahluleka iMamelodi Sundowns ukuqoqa amaphuzu agcwele nokunciphisa amathuba okuphula irekhodi layo lokunqoba isicoco seligi ngamaphuzu amaningi.
Ibambane neLamontville Golden Arrows ngo-1-1, ngoLwesithathu, emdlalweni weDStv Premiership obusePrinces Magogo Stadium, KwaMashu.
I-Arrows iyona eqale yabona kuqala imbobo yepali ngonyawo luka-Ryan Moon ngomzuzu ka-23. Elokulinganisa leSundowns linamathiselwe enethini uSipho Mbule obesuka ebhentshini ngoka-73.
Bekungumdlalo wesithathu kulandela amaBrazilians edlala ngokulingana.
Irekhodi lokusonga isizini ngamaphuzu awu-71 yalenza ngeka-2015/16.
Ukubambana kwawo naBafana Be'sthende kwenze labo mpetha beligi baba nawu-62.
Nokho isenalo ithuba njengoba uma ingayiqoba yonke esele izoba nawu-74.
Iye kulo mdlalo vele iphuma ekubambaneni ngeqanda neSwallows neCape Town City. Kwiligi igcine ukunqoba maphakathi noMashi ibhaxabula iRoyal AM ngo-5-1.
Elinye ithuba ngelokuphula eleKaizer Chiefs lika-1998/99 lokunqoba isicoco seligi ngokunqoba imidlalo ewu-22 emidlaweni ewu-30. AmaBrazilians asenqobe ewu-19. Adinga ukunqoba emithathu kule midlalo emine esele. Vele aselivikelile elokunqoba kulandelana isicoco seligi amahlandla ayisithupha.
Yindaba ehlukile kwi-Arrows njengoba leli phuzu liyinyusele kweyesithupha ngamaphuzu awu-33. Emdlalweni odlule, beyishaye omkhaya bayo iRichards Bay.
Ize kulo mdlalo ifuna ukuziphindisela kwazise emlenzeni wokuqala weligi iSundowns yadlula ngo-2-1.
Kucace zisuka ukuthi womabili amaqembu awafuna womathathu amaphuzu.
Ngoka-23, uMoon ulivalele phakathi kade egotshelwe ngobuchule ibhola uDivine Lunga.
Ukube uKnox Mtizwa noMoon bebefika ngesikhathi esisodwa ebhokisini leSundowns ngabe kukhulunywa ukuthi kuyiwe ekhefini i-Arrows isishaye noma amagoli amabili.
Kwesesibili, i-Arrows izigwaze ngowayo ivumela izitha ukuthi zihlasele. Baqale bashisa bengabaselwe abadlali beSundowns okukhona u-Ahmed Nasir, Cassius Mailula bephaselwa ngabasesiswini uMbule, Sphelele Mkhulise noHashim Domingo.
Noma seyishaye igoli lokulinganisa iSundowns iqhubekile nokuthwalisa kanzima unozinti we-Arrows, uSifiso Mlungwana owenze umsebenzi omkhulu. Kumele ukube lapho ekhona uVelemseni Ndwandwe uyazisola egeje esengaphansi kwepali likaRonwen Williams unozinti we’Downs, sekuyisikhathi sikanompempe.