Golden Arrows (0) 3
Marumo Gallants (1) 2
ILAMONTVILLE Golden Arrows icindezele emsileni iMarumo Gallants iyihlula ngo 3-2 ukunombela kwilog yeDStv Premiership ePrincess Magogo Stadium, KwaMashu ngoLwesithathu ebusuku.
Amagoli eGallants ashaywe nguCelimpilo Ngema noRanga Chivaviro ngamakhanda kwathi awe-Arrows aqatshuliswa inethi nguNqubeko Dlamini, Pule Mmodi noKnox Mutizwa.
Umphumela oncomekayo ubumqoka zinhlangothi zombili kula maqembu womabili ngokwahlukana ngenxa yokungawini isikhathi eside.
EzikaDan “Dance” Malesela, zifike KwaMashu zingayazi iwini emidlalweni emihlanu yeligi kanti abafana bakaMabhuti Khenyeza, baqale benezabo izinkinga okufakazelwa wukuthi bebesanqobe imidlalo emithathu kuphela ePrincess Magogo kule sizini.
IGallants isinemidlalo eyisithupha ihluleka wukuhlula i-Arrows koweligi.
Isimo sezulu besiwaphika womabili la maqembu aziwa ngokulibeka phansi.
Lithe ukuvela ibhola aziwa ngalo la maqembu ngomzuzu ka-14 selithe ukuhwamuka kancane izulu.
Yizivakashi kodwa ebezisho ukuwuqeda umcimbi nokho ngomzuzu ka-20, uSifiso Mlungwana obesezintini ze-Arrows, walanyulelwa nguDevine Lunga selimdlile.
Ngomzuzu ka-39 iGallants ithole iphenathi eshaywe nguNgema, yavinjwa kodwa yaphinde yaqedelwa ngekhanda.
Esiwombeni sesibili, yi-Arrows ebuye ngomfutho yaze yayithola imbobo ngomzuzu ka-53 ngegoli likaDlamini obengamakiwe evalela ifreekick kaMutizwa.
Kudlule imizuzu eyisithupha i-Arrows ilinganisile, uMmodi ywayibeka phambili okokuqala emdlalweni ngengcwenga yegoli.
U-Arubi uphinde wasala echaya izandla ngomzuzu ka-71, uMutizwa eshayelela i-Arrows igoli enqobe ngalo.
Ibuyile nokho iGallants ngegoli lesibili kade kuyikhona ngekhanda likaChivaviro ngomzuzu ka-77.
Ishintshe amagiya emuva kwalokho iGallants kodwa sagcina siyishiyile isikhathi.