UMKHUMBANE Classic ukhombe indlela abaqeqeshi abazakhela igama kwiKaizer Chiefs, uDominic Isaacs noSithembiso Ngcobo, maqede wavala isikhundla sabo ngoDoctor Mkhonza obehola Umsinga United kuma-ABC Motsepe National Play -Off abeseMgungundlovu emasontweni edlule.
Isolezwe lithole ukuthi okuholele ekutheni uSithembiso “Mashalofu” Mabaso ongusihlalo woMkhumbane, abakhombe indlela wukushaya udaka ngasekupheleni kwesizini edlule kwi-Stream A.
Emdlalweni wokugcina ezikaMashalofu zishaywe yiStone Breakers ngo-1-0 nokuholele ekutheni kusongwe kuqhwakele iMilford okusanda kuvela ukuthi ithenge Uthongathi FC.
Ngokusho komthombo, lokhu kulahla umgqigqo kweqembu lakhe ngemizuzu yokugcina kumnenge kakhulu uMabaso.
“U-Isaacs noSithembiso bazenze bona. Kungabe basaqhubeka nokusebenza ukube bebemlalela uMabaso. Ngangiqala ukubona uMabaso edinwe ngaleya ndlela emuva kokuthi ezakhe zishaywe yiStone Breakers emdlalweni wokugcina,” kubeka umthombo.
Leli phephandaba lithole ukuthi lesi sikhulu sesilande uMkhonza.
UMsinga bekuyiqembu lesithupha elidlala kwi-ABC Motsepe League uMkhonza elifaka kwekazwelonke yokuhlunga.
Amanye ngaMajuba, Abaqulusi, Newcastle Sicillians noMvoti amahlandla amabili.
“UMkhonza ufike ngeSonto eledlule eThekwini. Useqalile ukuhambe ebheka abadlali abazoqinisa iqembu lakhe. Ngempelasonto edlule ubenoMabaso kwi-Engen Knockout Challenge, eResevoir Hills, eThekwini,” kusho umthombo.
“Asethembe ukuthi ngoMkhumbane uzoliqeda ishobolo lokuhluleka ukwenyusela amaqembu kwiPSL.”
UMabaso ukuqinisekisile ukuthi u-Isaacs noNgcobo abaseyiyo ingxenye yeqembu. Ukuvumile nokuthi uselande uMkhonza.
“Ngenxa yezimo ezenzeke ngesizini eyedlule, sivumelane kahle nalaba baqeqeshi ukuthi sihlukane ngokuthula. Akungiphathanga kahle neze ukuhluleka ukungena emidlalweni yokuhlungela ukwenyukela kwiMotsepe Foundation Championship,” kusho yena.
“Ngibafisela inhlanhla laba baqeqeshi. Nginethemba lokuthi sizosebenza kahle noMkhonza. Ungumqeqeshi onamava kulesi sigaba esidlala kuso.”
UMkhonza ubonge kakhulu ngethuba alinikwe nguMsinga.
“Lapha kuMkhumbane umsebenzi wami ucace bha. Wukuwufaka emidlalweni kazwelonke yokuhlunga nokwenyukela kwiMotsepe Foundation Championship. Nginethemba lokuthi ngizosebenzisana kahle nazozonke izinhlaka zeqembu,” kusho uMkhonza.
Kuma-ABC Motsepe National Play-Offs ale sizini Umsinga bewuyiqembu lesibili elicijwa uMkhonza ukuphuma kowandulela owamanqamu. Kumasizini edlule kwenzeka okufanayo kuMvoti.