AS FAR (1) 4
Mamelodi Sundowns (0) 0
ISALE eMorocco indebe yeCaf Women's Champions League ngesikhathi iqembu lasekhaya, i-AS FAR litalabha iMamelodi Sundowns Ladies yakuleli ngo 4-0 kowamanqamu obubanjelwe ePrince Moulay Abdellah Stadium, eRabat, ngeSonto ebusuku.
UFatima Tagnaout ushaye igoli lokuqala obekuyiphenathi ngesiwombe sokuqala, u-Ibtissam Jraidi wahlohla amathathu ngesesibili ngaleso sikhathi iSundowns ibisisele nabadlali abayisishiyagalolunye enkundleni ngemuva kokuphuma kwababili ngamakhadi abomvu.
ISundowns ibiqala ukuhlulwa kulo mqhudelwano njengoba yayinqoba yonke imidlalo nyakenye ngesikhathi iqukula le ndebe e-Egypt. Ibingakanqotshwa nakulo nyaka ngaphambi kwalo mdlalo wamanqamu.
Igoli lokuqala lingene ngomzuzu ka-15, uTagnaout evalela iphenathi phakathi ngemuva kokuthi uZanele Nhlapo edlalise kabi uZineb Redouani ebhokisini.
Kube nzima kakhulu eqenjini likaJerry Tshabalala ngesikhathi uRhoda Mulaudzi ekhishwa ngekhadi elibomvu ngomzuzu ka-33, esolwa ngokuhlaba uRedouani eqakaleni.
Unompempe uqale wamnika ikhadi eliphuzi kodwa wabuye washintsha wamnika elibomvu ngemuva kokubukisisa isigameko kwi-Video Assistant Referee (VAR).
Iqembu lasekhaya libuye lisahlasela nesiwombe sesibili kwasebenza unozinti wamaBrazilians, u-Andile Dlamini, ngomzuzu ka-48, ephebezela ibhola ebelingqofwe ngu-Aziza Rabbah.
Abadlali bamaSandawana baqhubekile nokuzenzela phansi ngokumaka kabi, nokwenze ukaputeni uNhlapo wathola ikhadi lesibili eliphuzi ngomzuzu ka-52, ezakhe zasala sezinabadlali abayisishiyagalolunye enkundleni.
I-AS FAR ithole igoli lesibili kwi-freekick eqhamuke lapho. UTagnaout uligingqele uJraidi ebhokisini, waqhamuka kahle engamakiwe walivalela enethini.
Izinhlelo zeqembu lakuleli ziphinde zaphazamiseka ngesikhathi uBoitumelo Rabale exinwa ukugula okuthile. Odokotela baqale bamxilongela enkundleni ngaphambi kokuthi aphume esethwelwe ngohlaka.
Kuthe iSundowns isihlasela kakhulu ngasekupheleni komdlalo izama ukuthola igoli yashiya izikhala emuva. Igcine ijezisiwe ngomzuzu ka-88, uJraidi elibeka enethini esebhekene noDlamini.
Isipikilili sokugcina ebhokisini lokungcwaba amaSandawana sishayelelwe nguyena uJraidi elihlohla phakathi eseduze ngemuva kokuthi uDlamini ehluleke ukubamba ibhola ebeligotshwe nguTagnaout.
Izindondo zethusi zithathwe yiBayelsa Queens yaseNigeria enqobe iSimba Queens yaseTanzania ngo 1-0 ngoMgqibelo.