UNOZINTI weMarumo Gallants, uWashington Arubi, uveze ukuthi ukulahlwa ngamaqembu abasuka kuwona yikhona okubagqugquzelayo ukuthi bazinikele kwiCaf Confederation Cup.
IGallants idlulele kowandulela kowanqamu weConfederation Cup phezu kokuba iqala ukudlala kulo mqhudelwano. Izobhekana neYoung Africans yaseTanzania, emdlalweni womlenze wokuqala ekuhambeni ngoLwesithathu ngo-3 ntambama. Owomlenze wesibili uzoba seRoyal Bafokeng Stadium, eNorth West, ngoMeyi 17.
IGallants ibunjwe ngenqwaba yabadlali abaxoshwe kwamanye amaqembu okubekuthiwa sekuphelile ngabo ebholeni. Abanye kade sebephenduke ukudla kwebhentshi emaqenjini amakhulu kwiDStv Premiership, zagcina zingasavuselelwa izinkontileka zabo.
Kulaba badlali kukhona uKatlego Otladisa, Lucky Mohomi noSibusiso Kumalo abachithwa yiMamelodi Sundowns. Abanye nguJoseph Malongoane olaxazwe yiKaizer Chiefs, Mahlatsi Makudubela, Tshepo Gumede, Letsi Koapeng ababesemabhukwini e-Orlando Pirates. UJudas Moseamedi noSibusiso Sibeko bachithwe yiStellenbosch neLamontville Golden Arrows ngokwehlukana.
U-Arubi (37) waseZimbabwe, ukhuhliswe ibhentshi kwiSuperSport United ayijoyine ngo-2018 enethemba lokulenza elakhe ijezi. Uhlulekile wagcina edlulele kwiTshakhuma Tsha Madzivhandila ngo-2020. KuMatsatsantsa ijezi beliphethwe nguRonwen Williams osevimbela iSundowns.
"Singabadlali yilezo izinto ezisigqugquzelayo ngoba akusho ukuthi noma yikuphi lapho ofika khona uzodlala. Ungafika eqenjini ufice kunomdlali abacabanga ukuthi ungcono kunawe. Okufanele ukwenze wukubekezela, uqhubeke usebenze. Uma bekuxosha, ukwamukele lokho. Impilo injalo, inezihibe," kusho u-Arubi.
"Nami uqobo ngisuka kude. Ngihlale kwiSuperSport iminyaka emibili ngangadlala nowokubika umdlalo. Kodwa ngikwazile ukuvuka ngizithathe, ngashintsha umoya ngaphikelela eLimpopo. Yizinto ezinjalo ezikwenza ukhule njengomdlali nanjengomuntu nje."
Ukudlulela kowandulela owamanqamu kweGallants kusho amabhonasi aconsisa amathe kubadlali bayo.
Lokhu bakwethenjiswe ngusihlalo u-Abram Sello emasontweni adlule besalwela ukungena kuma-quaterfinals.
"Akukho mayelana namabhonasi. Ukufinyelela kowandulela owamanqamu weConfederation yinto enkulu kithina kumdlali ngamunye. Ngesikhathi siqala akekho noyedwa obelindele ukuthi singafika lapho esikhona. Ngiyajabula ukuthi siyazabalaza ngemithandazo nomfutho esiwufakayo. Simizimele ukudlulela kowamanqamu. Asisabheki emuva," kusho u-Arubi.