INHLANGANO eyengamele ibhola kuleli, iSouth African Football Association (Safa), ithi izothathela izinyathelo iRoyal AM neLindelani Ladies abadlali bawo ababambane ngezihluthu emdlalweni weHollywoodbets Super League.
Lesi sigameko senzeke ngasekupheleni komdlalo obusePrincess Magogo Stadium KwaMashu ngempelasonto, onqotshwe yiRoyal AM ngo 2-1.
Lo mdlalo ubusakazwa bukhoma kuSABC 1. I-video esabalele ezinkundleni zokuxhumana, ikhombisa abadlali bawo womabili la maqembu belwa enkundleni. Kuze kwangenelela nabebesemabhentshini bazolamula.
“ISouth African Football Association iphoxekile ngodlame olubonakale emdlalweni weHollywoodbets Super League phakathi kweRoyal AM neLindelani Ladies ePrincess Magogo Stadium, KwaMashu,” sifundeka kanje isitatimende seSafa.
“Umdlalo womkhaya obekufanele kube ngothokozisayo udicilele phansi isithunzi sebhola labesifazane. ISafa iwutholile umbiko we-Match Commissioner kulandela isigameko esisakazwe bukhoma kuSABC 1.
“Umbiko wonompempe uzocwaningwa ngaphambi kokuthi la maqembu abizelwe esigcawini sokuqondiswa kwezigwegwe. Lokhu kulandela impi equbuke enkundleni neholele ekutheni unompempe akhiphe abadlali abahlanu ngamakhadi abomvu umdlalo usuyophela.”
Ukunqoba lo mdlalo kubeke iThwihli Thwahla endaweni ka-11 ngamaphuzu ayisikhombisa emidlalweni eyisikhombisa.
ILindelani engomakoti kule ligi isendaweni ka-15 ngamaphuzu amane emidlalweni eyisikhombisa.
IMamelodi Sundowns isaqhwakele ngamaphuzu angu-18 kulandela ukubhudluza iRichmond United ngo 5-0.
IThunderbirds isemsileni ngeqanda emidlalweni eyisishiyagalolunye njengoba ixetshulwe yiJVW FC ngo 5-0.
Imiphumela yeHollywoodbets Super League yangempelasonto: TS Galaxy Queens 0-1 University of Fort Hare, Thunderbirds Ladies 0-5 JVW, UJ 2-0 Durban, UWC 4-0 City Lads, Richmond United 0-5 Sundowns, TUT Matsatsantsa 2-3 First Touch Ladies, University of Pretoria 3-2 Copperbelt Ladies, Royal AM 2-1 Lindelani Ladies.