AKAKUGQIZI QAKALA ukuqhathaniswa noyise uKamvalethu Cele oyibamba eqenjini leDStv Diski Challenge leMaritzburg United.
UKamvalethu (17), oyibamba enkabeni yenkundla kuleli qembu eliqeqeshwa nguPeter Petersen, uzalwa ngu-Andile "Sguda" Cele owayeyinjini ye-Orlando Pirates eminyakeni edlule.
Njengokujwayelekile uma umdlali ezalwa owayevelele, kukhona abalindela ukuthi afinyelele ezingeni likayise noma adlulele. Yisimo esifanayo nakwabanye abadlali abazalwa izihlabani ebholeni laseMzansi okukhona kubona u-Aiden McCarthy weKaizer Chiefs oyindodana kaFabian McCarthy owayeyibamba kwiChiefs, Mamelodi Sundowns neBloemfontein Celtic.
"Anginayo inkinga yokuqhathaniswa nobaba. Mina kodwa angicabangi ukuthi ungakwazi ukusiqhathanisa ngoba asidlali ngendlela efanayo. Yena wayengasheshi kanti mina ngiyashesha. Mhlawumbe yena wayehlakaniphile kunami, angazi. Kodwa mina ngiyashesha futhi ngiyahlasela," kusho uKamvalethu.
"Angicabangi ukuthi ukuqhathaniswa naye kungifakela ingcindezi ngoba nami angihambi ngisho ukuthi ngizalwa uyena ngoba angifuni ukwenza sengathi ngidlalela yena. Nami ngifuna ukuzakhela elami igama. Akungifakeli ingcindezi, anginankinga. Ngikulungele ukufinyelela ezingeni likababa futhi ngiledlule."
UKamvalethu, ogqoka unombolo 10, ungene esiwombeni sesibili ngesikhathi iTeam of Choice ikhala ngaphansi ngo 1-0 kwi-Orlando Pirates koweDiski ePrincess Magogo Stadium, KwaMashu, ngempelasonto.
EZimnyama ziqeqeshwa ngumngani omkhulu kayise, uJoseph "Dukuduku" Makhanya, anyuselwa naye esikimini esikhulu sePirates eminyakeni edlule.
"Umdlalo ubunzima kakhulu. Sizamile kodwa bekungahlangani kahle. Isikhathi sekhefu sishintshe okuningi. Besizitshela ukuthi bazobuya badlale ngendlela efanayo kodwa babuya ngendlela ehlukile. Nami ngingene ngisuka ebhentshini ngizitshela ukuthi umehluko uzoba khona. Nesimo sezulu besingasivumi. Sizamile okusemandleni kodwa ngebhadi bekungelona usuku lwethu," kusho uKamvalethu.
ITeam of Choice ilahlekelwe yinqwaba yabadlali abebekade beyiqinisile ngesizini edlule. Kulaba badlali kukhona uCameron Carnell ozalwa ngumfowabo kaBradley Carnell owaziwayo ebholeni laseNingizimu Afrika.
"Kunzima kakhulu kule sizini. Ngedlule bekunganjena. Besizama. Umdlalo uma unzima besikwazi ukuwuntshontsha. Kodwa kule sizini kunzima, sekungabanye abadlali. Baningi abadlali abahambile. Akusafani, sekunzima kakhulu," kusho uKamvalethu.
Imiphumela yemidlalo yeDStv Diski Challenge: Orlando Pirates 1-0 Maritzburg United; Chippa United 1-1 TS Galaxy; Golden Arrows 0-1 Sekhukhune United; Cape Town City 0-0 SuperSport United; Swallows 0-1 AmaZulu; Richards Bay 2-2 Marumo Gallants; Stellenbosch v Mamelodi Sundowns; Kaizer Chiefs 3-3 Royal AM.