ASEQALILE ukuqathaka kwiNedbank Cup amaqembu abethishwe ukuba abhebhezelile ifulegi leMotsepe Foundation Championship kwi-Last 32 yalo mqhudelwano.
NgoLwesibili, mahlanu amaqembu akulesi sigaba esiphakela esikhulu azibekisele indawo kwi-Last 32 kulandela ukunqoba imidlalo yawo.
Kwakhale ngaphansi kuqapheleke nalawa obekuyiwona athishwe ukuba amele lesi sigaba ngenxa yendlela aqale ngayo isizini noma umlando anawo eminyakeni edlule kwiNedbank Cup.
IPretoria Callies, Platinum City Rovers, JDR Stars, Hungry Lions neLa Masia bonke badlulele phambili obekushiya ngaphandle iMarumo Gallants, Orbit College, Baroka FC, Casric Stars neMagesi FC.
IGallants eyake yaba ompetha beNedbank ikhishwe iCity Rovers eyinenebule ngo 3-1. Lo mphumela ubulandela owe-Orbit eqhwakele kwi-log nebithwelwe ngeqoma kodwa yakhishwa i-JDR Stars ngo 1-0.
ICasric okusale kancane ukuthi ikhuphukele esigabeni esikhulu kwazise ibiyingxenye yeyokuhlunga ngesikhathi kuvale isizini edlule, nayo ngeke isimele lesi sigaba kwNedbank njengoba ikhahlelelwe ngaphandle iHungry Lions.
UClinton Larson oyazi ukusuka nokuhlala iNedbank namaqembu awaqeqeshe esigabeni esikhulu nebanga alihambe neSummerfeild Dynamos kumasizini adlule, uhlulekile ukusiza iMagesi ishaywa iPretoria Callies ngo 1-0
Kube esifanayo nakuDan “Dance” Malesela oqeqesha iBaroka, ongeke abonakale kulo mqhudelwano anomlando wokuwudla ngo-2019, ngesikhathi esapheka i-TS Galaxy.
IBaroka ishaywe iLa Masia kaDaine Klate, onomlando wokuqukula iNedbank esengumdlali we-Orlando Pirates.
UKlate unqobe ngo 4-2, sekukhahlelwa amaphenathi emdlalweni ophele zibambene ngo 2-2.
Amanye amaqembu amathathu ajoyine lawa amahlanu kwi-Last 32 kulandela ukunqoba kwayo yangoLwesithathu.
Imiphumela yemidlalo yangoLwesithathu ihambe kanje:
Milford 2-0 Upington City; Maritzburg United 2-1 Black Leopards; Venda Football Academy 1 (12) -1 (13) University of Pretoria.