Kaizer Chiefs (1) 2
Maritzburg United (0) 0
IKAIZER Chiefs iwuvale kahle unyaka ngesikhathi inqoba ekhaya kwiMaritzburg United emdlalweni weDStv Premiership ogijinywe ngoLwesithathu ebusuku e-FNB Stadium, eSoweto.
IChiefs inqobe lo mdlalo wayo wokusonga u-2021 ngamagoli kaKhama Billiat noNkosingiphile Ngcobo abawashaye ngokwehlukana kweziwombe.
Amakhosi afike kulo mdlalo ebhodla umlilo kwazise ukungashaywa kwawo imidlalo yeligi emihlanu ilandelana, kunqanyulwe kabuhlungu yiRoyal AM ngempelasonto edlule, ebese iwaphinda okwesibili kule sizini.
Ngenxa yalesi sibhaxu seRoyal AM, abafana baka-Arthur “10111” Zwane, obambe ibhentshi kwiChiefs, basuke endaweni yesibili kwi-log bawela kweyesithupha ngaphambi kwalona we-United.
Okucace ngemizuzu yokuqala engu-30 yomdlalo ukuthi iChiefs ibingadlalisi okweqembu elinesifiso sokunombela kwi-log.
Eqinisweni, izivakashi izona ebezibukeka zingcono uma zihlanganisa amaphasi ziya phambili.
Bobabili onozinti bebezipholele kwaze kwaba wumzuzu ka-36, lapho uBilliat ebeke khona iChiefs ebuhleni kulandela iphasi enhle kaNjabulo Blom.
Ngasohlangothini lwezivakashi, akukho obekudingeka kuzona ngaphandle kwamaphuzu amathathu okuvala unyaka ongazange ube muhle njengoba zifike kulo mdlalo zingayazi iwini kweyisishiyagalolunye ilandelana yeligi.
Kubukeke sengathi kuyayivusa iTeam of Choice ukungenelwa igoli kodwa zize zaya ekhefini ingakamthwalisi ubunzima uDaniel Akpeyi emapalini eChiefs.
Esiwombeni sesibili ikhona ethathwe uKeagan Ritchie ishaye ipali ngomzuzu ka-53 okufakazela ukuthi iMaritzburg iyona ebuye ngomfutho ongcono ekhefini kuneChiefs.
Kwenzeka lokhu nje, uBongokuhle Hlongwane, obesanda kungena ubeseyeke ithuba elilula lokulinganisa emuva kwephutha likaDaniel Cardoso emuva.
Ngemuva komzuzu ka-70 umdlalo uqalile wafudumala okulandelwe ukuthi kuswelakale ogadlayo phakathi kuka-Ernst Middendorp noZwane emabhentshini amaqembu.
Nakubadlali bekuyinto efanayo njengoba umdlali wasemuva weChiefs, uSiyabonga Ngezana esinde ekukhishweni ngekhadi elibomvu emuva kokuzama ukungqubuza ngekhanda uHlongwane.
Ngomzuzu ka-80, igcwalile incwadi yeChiefs ngesikhathi uNgcobo obesanda kungenela uPhathutshedzho Nange (oxinwe ukugula wakhishwa), eshaya ingcwenga yegoli lokushayela isipikili sokugcina emuva komdlalo omuhle kaBilliat, asala kanjalo amaphuzu amathathu eFNB Stadium.