UHLANGANISE abadlali abazinze phesheya nakuleli uDuncan Crowie, ongumqeqeshi weqembu lesizwe lakuleli labafana abaneminyaka engaphansi kuka-17, abazodlala kwi-Africa Cup of Nations (Afcon).
Lo mqhudelwano uzoqala ngo-Ephreli 29 uphele ngoMeyi 19, e-Algeria. Elakuleli lizowuqala kuGroup B lapho liqhathwe neNigeria, Morocco, neZambia.
Amajimbos aqale ikhempu nabadlali abangu-28 eSafa National Technical Centre ngo-Ephreli 9, ngaphambi kokuthi uCrowie akhethe iqembu lokugcina elinabadlali abangu-21.
Azodlala owobungani kuleli sonto ngaphambi kokuthi alibangise e-Algeria, lapho ezodlala eminye emibili yokungcweka.
Umqhudelwano azowuvula ngo-Ephreli 30, neMorocco eMohamed Hamlaoui Stadium, eConstantine, abhekane neZambia enkundleni efanayo ngoMeyi 3, kuthi ngoMeyi 6, esonga eyamaqoqo neNigeria.
Amaqembu amane azofinyelela kweyandulela owamanqamu azozibekisela izindawo eNdebeni yoMhlaba ezokuba ngoNovemba, ePeru.
Phakathi kwabadlali abangakhethwanga kubalwa ongukaputeni weqembu leLiverpool lika-Under 15, uGabriano Shelton. ULucas Jetten we-Ajax, uThuto Mojanang weFeyenoord, no-Arron Rydell weNordsjaelland, basale ngaphandle ngenxa yokuthi abafikanga ekhempini.
Ufakiwe umgadli weMamelodi Sundowns, uSiyabonga Mabena, nakuba kuke kwaba namahebezi okuthi iqembu ngeke limdedele ngoba lihlose ukumsebenzisa emidlalweni esele yeligi.
Lo mgadli waba yiqhawe ngokuhlohla amagoli ayisishiyagalolunye, waqokwa njengomdlali ovelele ngesikhathi iqembu lakuleli linqoba isicoco seCosafa nyakenye.
Umdlali wasesiswini ogijima kwiVitesse yaseNetherlands, uMichael Dokunmu, ulitholile ithikithi elibheke e-Algeria, ngemuva kokukhetha ukudlalela iNingizimu Afrika.
Uyise ngowaseNigeria, unina owakuleli kanti bekubikwa ukuthi iqembu lesizwe elincane laseNetherlands, bese liqalile ukumeshela.
Yize ezodlalela Amajimbos emqhudelwaneni, usengakwazi ukushintsha adlalele iNigeria, noma Netherlands, emaqenjini amakhulu.
Iqembu lesizwe labafana lika-Under 17 elizodlala kwi-Afcon:
Onozinti: Takalani Mazhamba (Kaizer Chiefs), Gennaro Johnson (Cape Town Spurs), Klye Jansen (Atlanta United, USA)
Izitobha: Xhosa Manyama (Cape Town Spurs), Keitumetse Lesia, Benjamin Wallace (SuperSport United), Waylon Renecke (Norwich City, UK), Vincent Sithole, Thato Sibiya (Mamelodi Sundowns), Tyler Cicero (Stellenbosch FC)
Abesiswini: Xolani Tshaka (Orlando Pirates), Gomolemo Kekana (TS Galaxy), Vicky Mkhwana ( Kaizer Chiefs), xavier Jodamus (Ubuntu Academy), Dhakier Lee (Cape Town Spurs)
Abagadli: Michael Dokunmu (Vitesse, Netherlands), Orifha Maubelo, Gabriel Amato (Capital City FC, Canada), Luke Baartman (Cape Town Spurs), Bennet Mokoena, Siyabonga Mabena (Mamelodi Sundowns).