OYIMENENJA yeNewcastle Chess FC edlala kwiSafa KwaZulu-Natal Sasol League, uthi kuyabakhuthaza kakhulu abadlali beqembu lakhe ukubona iqembu ebebedlala nalo esigabeni esisodwa ngesizini edlule, iLindelani Ladies, seligijima kwesikhulu sebhola labesifazane iHollywoodbets Super League.
INewcastle Chess phambilini ebeyaziwa ngeNewcastle Ladies, ingelinye lamaqembu ahlale esembangweni wesicoco seligi kwiKZN Sasol League njengoba nangesizini edlule yadlala neLindelani Ladies kumaPlay-Off esifundazwe okuhlunga ompetha baKwaZulu-Natal.
Sekuwumlando ukuthi iLindelani yiyona eyayimele iKZN kumaPlay-Off kazwelonke eSasol League eBloemfontein, eFree State ngo-Okthoba nyakenye, yagcina iphumelele ukukhushulelwa esigabeni seHollywoodbets Super League eyibambe kuso kule sizini ka-2024.
UWeisy Mothoalo oyimenenja yeChess evule isizini, uthe inhloso yabo enkulu kule sizini wukuya kumaPlay-Off kazwelonke okulwela ukukhushulelwa kwiHollywoodbets Super League.
Ivule ngokuxebula iqembu elingomakoti iDiski Pros Academy ngo 7-0, yalandela ngokuzithathela amaphuzu ingawajulukelanga igingqela iSunflower WFC obekumele idlale nayo emdlalweni obubhhekiwe ngeSonto, Osizweni Stadium, eNewcastle.
Ukuqala ngonyawo oluhle kweChess kusho ukuthi yiyona ezihola phambili kwi-log kaStream A ngamaphuzu ayisithupha emidlalweni emibili.
“Ukubona iqembu ebesidlala nalo kulesi sigaba seSasol League selidlala kwiHollywoodbets Super League kuyasikhuthaza kakhulu ekutheni nathi singakwenza kwenzeke, sigcine singenile kwiSuper League.
Okuyingakho-ke kule sizini umgomo wethu esizibekele wona njengeqembu kuwukulwa ngakho konke esinakho ukuthi sifinyelele kweyokuhlunga kazwelonke yeSasol League okokuqala emlandweni weqembu.
Sinesikwati esiqinile esesidlale ndawonye isikhathi, esinabadlali abanesipiliyoni nalabo abasebancane abalambele impumelelo ebholeni, engikholwa wukuthi bazokwazi ukusifeza lesi sifiso sethu,” kusho uMothoalo.
Uthe igama balishintshe ngoba usihlalo weChess FC edlala kwiKZN ABC Motsepe League, uVusi Kubheka, nguyena ongusihlalo weqembu labo futhi nabaqeqeshi babo, uThokozani Masondo noShaqa Kubheka bayibambe kuwona womabili amaqembu.
Ngemuva kokukhuphukela kweLindelani kwiSuper League umbango wesicoco seligi kwiStream B kubhekeke ube phakathi kwamaqembu okubalwa kuwo iWestville United ne-UniZulu Ladies, okuyiyona elale isibili ngesizini edlule ngemuva kweLindelani.
I-UniZulu isazihola phambili kuStream B ngokunqoba imidlalo emibili esadlaliwe, okubalwa newunqobe ngempelasonto ibhaxabula iShooting Stars Ladies ngo 2-0.
Imiphumela yangempelasonto yeSafa KwaZulu-Natal Sasol League:
Stream A: Diski Pros Academy 0-2 PSG Amabhaca FC (kugingqiwe); Newcastle Chess 2-0 Sunflower WFC (kugingqiwe); DUT Midlands 8-0 Umlazi Arsenal; DUT Coastal 0-0 Dlala Ntombazana
Stream B: Darnall Ladies 1-1 Westville United Ladies; UniZulu Ladies 2-0 Shooting Stars; Ezemvelo 1-1 Romans Stars Ladies; Makhanisi Ladies 0-0 Mshwathi Future Stars