UFUNGA uyagomela umqeqeshi weLamontville Golden Arrows, uMabhuti Khenyeza ukuthi ngeke bashaywe induku efanayo kule sizini ka-2024/25 njengoba kwenzekile ngesizini edlule.
Abafana Bes’thende baphinde bajabulisa abalandeli babo beshaya ngo 2-0 iMarumo Gallants emdlalweni weBetway Premiership obuseMpumalanga Stadium, eHammarsdale.
Lo mphumela ubeke leli qembu laseThekwini eqhulwini kwi-log ngamaphuzu ayisithupha kwazise nangesonto eledlule livule namaphuzu agcwele, lithela phansi iStellenbsoch ngomphumela ofanayo.
Ngempelasonto uKnox Mutizwa noNdunduzo "Sulumane" Sibiya yibona abashaye amagoli.
Nangesizini edlule i-Arrows yayiqala kahle iligi inqoba imidlalo emithathu kwemihlanu yokuqala. Ayemaningi amathemba okuthi ingase iqede ku-Top 8. Nokho ngokuhamba kwesikhathi yawulahla lo mgqigqo, yaphenduka ukudla kompetshisi.
Igcine isonge iligi isendaweni yesishiyagalolunye.
UKhenyeza uthe bafundile emaphutheni abo.
"Ngeke kusisize ngalutho ukubuyela emuva, kumele sibheke ikusasa ukuthi lisiphatheleni. Sifundile emaphutheni esiwenze ngesizini edlule. Kule sizini siyazi ukuthi yini okumele siyenze noma singayenzi.Isizini entsha le, inobubi nobuhle bayo," kubeka uKhenyeza.
Uncome abadlali bakhe ngokumelana nobunzima ngesikhathi bebhekene neMarumo ebishaywa okwesibili kulandelana. Kowokuqala ihlulwe iKaizer Chiefs ngo 2-1.
"Siqale sathwala kanzima, singadlali ngendlela ebesihlele ngayo. Nokho sikwazile ukukulungisa lokhu ngokuhamba kwesikhathi. Abemahle kakhulu amagoli esiwashayile. Nokho maningi amathuba esihlulekile ukuwasebenzisa."
NgoLwesithathu, i-Arrows izobhekana neMagesi, ngo-7.30 khona eMpumalanga Stadium. IMagesi iyikanqobi nowodwa. Ngempelasonto edlule ishaywe iPolokwane City ngo 2-0. Kowokuqala yaguqiswa iSekhukhune United ngo 1-0.
Khona kusasa iMarumo eqeqeshwa uDan Malesela, izodlala neMamelodi Sundowns, ngo-5.30 eLoftus Versfeld Stadium.
Imiphumela yemidlalo yeBetway Premiership: Magesi 0-2 Polokwane City; Golden Arrows 2 0 Marumo Gallants; SuperSport United 0-0 Royal AM; Chippa United 1-0 Richards Bay.
Imiphumela yeMotsepe Foundation: Durban City 1-1 Highbury; Venda Football 0-1 Leruma United; Upington City 0-0 Pretoria University; Baroka -0 Kruger United; JDR Stars 0-2 Casric Stars; Ortbit College - Black Leopards; Pretoria Callies - Milford.