ANGASE asheshe abuyele ezingeni lomhlaba uZolani ‘Last Born’ Tete emva kwemibiko yokuthi uhlelelwa impi ngoDisemba.
Emasontweni edlule uMlandeli Tengimfene ophethe izindaba zikaTete utshele leli phephandaba ukuthi iQueensbury Promotions yase-England, eqhatha ezakhe ihlela ukumqhatha no-Emmanuel “ Manny” Rodriguez wasePuerto Rico, empini obekuzoba ngeyokungcweka.
Kubukeka izinto zesizoshintsha njengoba uTengimfene etshele Isolezwe ukuthi laba ngeke besalwa kweyokungcweka kodwa sebezotholana phezulu kweyokuhlungela ukulwela ibhande leWBC Bantamweight. Ozonqoba kubo uzoba endaweni yokuqala ezilinganisweni zeWBC. Kulezi zilinganiso uRodriguez ukweyesine bese uTete abe kweyesikhombisa.
Njengamanje ibhande leWBC Bantamweight liphethwe inxele uNordino Oubaali waseFrance. NgoDisemba 12 uzovikela isicoco kuNonito ‘The Filipino Flash’ Donaire wasePhilippine, eMohegan Sun Casino, e-United States of America (USA).
“Kunjalo nje, uZolani ngeke esalwa noRodriguez kweyokungcweka kodwa sebezokulwa kweyokuhlungela iWBC Bantamweight. Ozonqoba kulaba uzoqhwakela ezilinganisweni. Lokhu kuzophoqa ozonqoba phakathi kuka-Oubaali noDonaire ukulwa noTete noma uRodriguez. Sijabule ngendlela eyisimanga. Lezi zindaba zisho ukuthi usezobuyela ezingeni lakhe lokuba ngomunye wompetha bomhlaba,” kubeka uTengimfene.
NgoNovemba wanyakenye uTete uphucwe nguJohn Riel Casimero wasePhilippines, ibhande le-WBO Bantamweight.
Ngakolunye uhlangothi uRodriguez ugcine ukulwa ngoMeyi ngonyaka odlule ephucwa uNaoya Inoue waseJapan ibhande le-IBF.
Ngo-Okthoba 31 emphelandaba eMGM Grand, eLas Vegas, * -Inoue uzolwela lesicoco neseWBA Super Bantamweight ezivikela kuJason Moloney wase-Australia. UTete usanqobe izimpi ezingu-28 wahlulwa kwezine. URodriguez uwine eziwu-19 wehlulwa kweyodwa.
Sisekuzo ezamabhande omhlaba, kusasa * -Artur Beterbiev waseRussia uzovikela i-WBC ne-IBF Heavyweight ku-Adam Deines waseGermany, eMoscow. NgoMgqibelo eMelika, uGervonte Davis noLeo Santa Cruz bazobanga ibhande leWBA Lightweight/Junior Welterweight.