LUNGILE MAJOKA
KUCHWAZE izihlwele eKingsmead Cricket Stadium, eThekwini ngeSonto, intokazi yakuleli, uGerda Steyn, iphula irekhodi leminyaka labesifazane kwiComrades Marathon, inqoba umjaho ngo-5:44:54.
UGerda obemamatheka engakhombisi izimpawu zokukhathala noma ukuzwela izinhlungu, wephule irekhosi likaFrith Van der Merwe, aliqopha ngo-1989 kuphunywa eMgungundlovu eshaya intambo ngo-5:54.43.
Amehlo abaningi abathanda iComrades abevele ebheke kuGerda ukuthi angalephula leli rekhodi njengoba ngo-2019, agijima umjaho ngesikhathi esingaphansi kwamahora ayisithupha, okuyinto eyayigcine ngaye uVan der Merwe.
Lo mgijimi osengaphansi kwePhantane AC, uzohlomula ngo-R500 000 wokunqoba, kube u-R500 000 wokwephula irekhodi no-R200 000 wokuba ngowokuqala ukungena entanjeni.
Indlela uGerda abevule ngayo igebe phakathi kwakhe nabamlandelayo, uthole ithuba lokubuyela emuva eyojabula nezihlwele, ebukeka esawumqemane kungakhombisi ukuthi ubesanda kuqeda ukugijima ibanga elingu-87.7km kusukwa eMgungundlovu.
UGerda, ojoyine iPhantane ekuqaleni konyaka, useke wayinqoba iComrades ngo-2019 kunyukwa ngo-5.58.53.
Uye kwiComrades ehambela phezulu njengoba ekuqaleni konyaka eqophe umlando enqoba iTotalsport Two Oceans 56km Ultra Marathon okwesine kulandelana.
Endaweni yesithathu kungene u-Adele Broodryk naye ogijima ngaphansi kwamahora ayithupha (5:56:26). Indawo yesithathu ithathwe uCarla Molinaro (6:00:23).