IYIPHAKAMISE ngomuzwa omuhle indebe yeHollywoodbets Super League iMamelodi Sundowns Ladies ngemuva kokunqoba iRichmond United ngo-4-2 emdlalweni wokugcina wesizini obuseLucas Moripe Stadium ngoMgqibelo.
Bekuvele sekubhaliwe ukuthi amaSandawana azonikwa le ndebe ngemuva kwalo mdlalo njengoba aqinisekiswa njengompetha ngenyanga edlule, kusasele imidlalo emine.
Lokhu kusho ukuthi lesi sicoco sebesinqobe kathathu kulandelana. Lokhu kusho ukuthi yibona kuphela iqembu eselike layithinta le ndebe kusukela yasugulwa le ligi ephezulu ebholeni labesifazane eNingizimu Afrika ngesizini ka-2019/2020.
Leli qembu eliphekwa nguJerry Tshabalala liqede isizini linamaphuzu angu-82 emidlalweni engu-30. Linqobe imidlalo engu-27, lahlulwa kwemibili, ladlala ngokulingana kowodwa.
Lihlohle amagoli angu-126, langenelwa angu-11 kuphela.
Lokhu kusho ukuthi lizophinde limele iNingizimu Afrika kweyokuhlungela iCaf Champions League ngonyaka ozayo. ISundowns yaba ngompetha bokuqala balo mqhudelwano nyakenye kodwa kule sizini inqotshwe yi-AS FAR yaseMorocco ngo-4-0 kowamanqamu.
Ompetha beligi bathole isheke likaR2 million, iqembu eliphume isibili lizothola uR1 million, kwathi amanye amaqembu ahlomula ngoR150 000.
I-University of Western Cape (UWC) igcine iwunqobile umbango wokuqeda endaweni yesibili ngokushaya iDurban Ladies ngo-2-0 e-UWC Stadium, ngoMgqibelo.
Le ndawo ibiyibanga neTshwane University of Techonology (TUT). I-TUT ibhaxabule iGolden Ladies ngo-5-1 emdlalweni wayo wokugcina kodwa yaphelela endaweni yesithathu ngamaphuzu angu-65, i-UWC isinawu-68.
Amaqembu amabili azinze KwaZulu-Natal asazodlala kule ligi ngesizini ezayo. IBloemfontein Celtic (ethengwe iRoyal AM), iqede endaweni yesithupha ngamaphuzu angu-51.
IDurban Ladies iqede endaweni ka-10, ngamaphuzu angu-37.
Amaqembu amabili agawulwe yizembe yiGolden Ladies yaseNorth West, eqede endaweni ka-15 ngamaphuzu angu-13, neTsunami Queens yaseFree State, eqede emsileni ngamaphuzu angu-10.
La maqembu azodlala kwiSasol Provincial League ngesizini ezayo. Izindawo zawo zizothathwa yiCopperbelt Ladies, enqobe iSasol National Championships kule sizini, ne-University of Pretoria efinyelele kowamanqamu.
Ukaputeni we-JVW FC, uNompumelelo Nyandeni, uyena oshaye amagoli amaningi kunabo bonke abadlali kule sizini njengoba ehlohle angu-30. Ngesizini edlule, leli rekhodi ubeliphethe no-Andisiwe Mgcoyi weSundowns ngemuva kokuthi bobabili beshaye amagoli angu-27.