SEKUQINISEKISWE iKenya, edume embhoxweni wama7s njengezimbangi, ezizobhekana nabaseNingizimu Afrika abavotelwa ngabalandeli abaphuza iCarling Black Label ukuba badlale kwiChampions Match eseLoftus Versfeld ngoNovemba 6.
IKenya idume kuma-Sevens kwazise kuhlezi kuyiyo namaBlitzbokke abamela i-Afrika kwindumezulu yeHSBC Sevens ejikeleza amadolobha ahlukene emhlabeni.
Ayinawo nokho umlando ophathekayo embhoxweni wabadlali abangu-15 kwazise ayikaze idlale nakwiRugby World Cup nokuyikho okwenza iziphathimandla zombhoxo zakuleliya lizwe zilithakasele ithuba elivela neChampions Cup.
“IKenya Rugby Union (KRU) ithobeke kakhulu ngokumenywa yiSARU ukuba yingxenye yeCarling Champions Cup ePitoli,” kucashunwa u-Odour Gangla, ongumqondisi kwiKRU.
“Leli kuzoba yithuba elihle lokuba iSimbas (isiteketiso seqembu laseKenya) idlale nezimbangi ezingongcweti ikakhulu njengoba silungiselela imidlalo yamatest ezayo.
“Amava esizowacosha kulo mdlalo ngeke afaniswe nalutho njengoba silungiselela eyokuhlungela iRugby World Cup kusuka ngonyaka ozayo.”
IKenya izoletha isikwati sayo esethembile kanti abakuleli abangu-24 abazoba yingxenye yomdlalo bavotelwa ngabalandeli ngokuthenga ingudu yeBlack Label noma ikani elikhulu elingu-500ml.
Kvotwa ngokuphequla isivalo sengudu noma icici lokuvula ikani ngaphansi okunekhodi ovotayo ayifaka ngemuva kokucofa kumakhalekhukhwini wakhe u *120*660* ikhodi leyo#.
NgokwabakwCarling, kumahhala ukuvota kwabasebenzisa iVodacom kanti abanye bakhokha u-20c.
Kuyavoteka nakwi-www.carlingcurriecup.com.
Noma ufake leya khodi kwiFacebook Messenger.
Njalo ngemuva kwamavoti amathathu umlandeli uthola ivoti eliyibhonasi aphinde abe sethubeni lokuhlabana nge-airtime.
Amanye amakhodi abalandeli bayawaphiwa emakhasini eCarling Black Label eTwitter naweFacebook ngaphansi kwesiqubulo esithi ‘Choose Your Champion Team’.
U-Arné Rust, oyiCarling Black Label Brand Director, uthe amavoti ayachichima kwazise asedlulile ku-400 000.
UJurie Roux, isikhulu esiphezulu kwiSA Rugby, utuse iKenya kodwa akaphawulanga ngamathuba okuthi abalandeli bavunyelwe enkundleni ngosuku lomdlalo.
Esinye isimemezelo esilindwe ngabomvu ngesokwethulwa kwethimba labaqeqeshi beChampion Team.