SIBUKISE ngeKenya Simbas siyivathela ngo 85-17 isikwati sabadlali abavotelwe ngabalandeli bombhoxo abaphuza iCarling Black Label, iCarling Champions ebingosokhaya kwiChampions Match eLoftus Versfeld ngoMgqibelo ntambama.
Kuma-try angu-15 abaselwe kulo mdlalo izolo, angu-13 ngaweCarling Champions nokushiya iKenya namabili nephenathi eyodwa.
Iprop esanda kunqoba iCarling Currie Cup neVodacom Bulls, uSimphiwe Matanzima, iqokwe njengomdlali ovelele osukwini.
Isikwati seCarling sivotelwe abalandeli kusuka ekupheleni kuka-Agasti kwethulwa lo mqhudelwano obudlalwa okokuqala izolo.
Abadlali abebevotelwa bakhethwe emaqenjini ezifundazwe ayizikhombisa adlale kwiCarling Currie Cup ka-2021.
IKenya edume embhoxweni wama-7s, ibe zimenywa kulo mdlalo.
Izolo kuyicacele ukuthi lide kakhulu ibanga okusazomele ilihambe ukufika ezingeni lokuqhudelana namazwe emidlalweni yama-test.
Lokhu kungenxa yokuthi izolo ibibophele isikwati sayo ezimisele ukungenela ngaso kweyokuhlungela imiqhudelwano emikhulu njengeRugby World Cup.