IQEMBU laphesheya elidlala kwi-English Premier League, iBrentford FC lelule isandla njengoba lizoba ngomunye wabaxhasi bemijaho kwiHollywoodbets Durban July yalo nyaka.
Umjaho uzoba ngoJulayi 2 eGreyville Racecourse, eThekwini.
Ngokwesitatimende esithunyelwe ngabeHollywoodbets ngoLwesibili, iThe Bees izoxhasa umjaho kaGr1 weGarden Province Stakes, obekelwe uR1 million.
Okwenziwe yiBrentford kuwumlando njengoba iyiqembu lokuqala langaphandle ukuxhasa umjaho wamahhashi eNingizimu Afrika.
Akungatshwazwa ukuthi ukuba khona kweThe Bees kuzoletha isinongo esihlukile kwabezemfashini, abazobe behambele umjaho wanonyaka onengqikithi ethi ‘Show me The Honey’.
Umjaho kaGr1 usuzobizwa ngeThe Brentford FC Garden Province Stake. Usuzobalwa neGr 1 Schweppes Majorca Stakes neGr1 HSH Princess Charlene Empress Club.
Isikhulu esiphezulu kwezokumaketha kwiGold Circle, uSteve Marshall, sikufanise nempumelelo kwezemijaho yamahhashi ukuxhaswa yiBrentford.
“Kuyasijabulisa kakhulu ukwamukela iBrentford FC eThekwini. I-The Garden Province Stakes ngomunye wemijaho ephambili kwisizini yeSA Champions. Umlando ukhombisa ukuthi ihlezi iphethe amahhashi ekhethelo wodwa, aqhamuka kuyona yonke iNingizimu Afrika. Ukuba neqembu elaziwayo emhlabeni njengeBrentford FC elilandelwayo emhlabeni kufana nokufaka olunye uphaphe kubona bonke esibambisene nabo. Kuveza nokuthi lo mjaho ohamba phambili e-Afrika uyakwazi ukuheha neso lomhlaba,” kusho Marshall.
IBrentford FC ixhaswe yiHollywoodbets ngemuva kokukhuphukela kwiPremiership ngokunqoba imidlalo yokuhlunga ngesizini ka-2020/2021 yeChampionship.
Isikhulu esiphezulu seBrentford, uJon Varney, sithe: “Ubudlelwano bethu neHollywoodbets sebukhule kakhulu kule minyaka emibili. Siyiqembu nenkampani sikholelwa ezintweni ezifanayo. Sikubheke ngabomvu ukuxhasa iGarden Province Stake nokumeleleka kwiDurban July Hollywoodbets eGreyville. Nathi sizoba yingxenye yokugujwa komdlalo womjaho wamahhashi.”
Amathikithi okuhambela iHollywoodbets Durban July aseyatholakala. Thola imininingwane egcwele kwi-www.hollywoodbetsdurbanjuly.co.za