KULINDELEKE ukuthi athathe unkosikazi wesibili osezakhele olukhulu udumo ngokuhlela imicimbi yesintu.
UXolani Mcineka ozakhele udumo ngomcimbi weMpucuzeko Music Festival neNgoma kaZwelonke kulindeleke ukuthi ambese futhi akhehle ingoduso yakhe, uNonduduzo Ndelu ezokuba yemuliswa.
Umthombo opotshozele Isolezwe Ngempelasonto Online lolu daba uthe, akusekho ukujikela emva kwendlu, uyathatha umfoka Gwazela.
“Yize ngingeke ngakunika usuku nenyanga yomcimbi kodwa umembeso, umkhehlo nokwemuliswa kwengoduso kuzokuba khona kulo nyaka,” kuchaza umthombo ongashayi phansi.
Isolezwe Ngempelasonto Online lizamile ukuthola ukuphawula kukaMcineka kodwa lahluleka lancama, yize beselimthumelele nomyalezo kuWhatsApp nobewukhombisa ukuthi usewufundile.
Kwenzeka konke lokhu nje uMcineka umatasa nokuhlanganisa umcimbi weMpucuzeko ozokuba ngo-12 Agasti 2023 eMoses Mabhida People’s Park .
