KUQHUME ihlombe ngesikhathi uSomlomo wePhalamende, uNkk Nosiviwe Mapisa-Nqakula, ememezela ukuthi uvunywe ngo-elethu uMvikeli woMphakathi omusha u-Adv Kholeka Gcaleka, ukuthi athathe izintambo.
U-Adv Gcaleka uvotelwe ngamalungu angu-244 ePhalamende ukuthi abe nguMvikeli woMphakathi Angu-12 amalungu ePhalamende avotele ukumchitha umvikeli.
Amalungu abevota ngokuthi yebo, noma cha ePhalamende ukuvotela umvikeli omusha omncane kunabo bonke kuleli.
Sekulele kuMengameli Cyril Ramaphosa ukuthi amkhethe ngokusemthethweni u-Adv Gcaleka (42) esikhundleni.
UNkk Mapisa-Nqakula, uthe iPhalamende liwuphothulile umsebenzi walo ngokuphakamisa u-Adv Gcaleka esikhundleni.
Amaqembu i-ANC, EFF ne-NFP avotele ukuqokwa kuka-Adv Gcaleka kanti amalungu e-DA anqume ukuphuma adube uhlelo.
Kusuke umsindo ngesikhathi ilungu le-DA u-Adv Glynnis Breytenbach, liyalelwa nguSomlomo ukuthi liphume emva kokuba linqabe ukuhoxisa elikusho ngo-Adv Gcaleka.
U-Adv Breytenbach ubephikisa ukuqokwa kuka-Adv Gcaleka emsola ngokuthi waze wanyuselwa esikhundleni esiphezulu ngoba enobudlelwane nowayeyisikhulu sophiko lwezokushushisa i-NPA, u-Adv Menzi Simelane.
Ngesikhathi esho lokhu amanye amalungu e-ANC amhhewulile.
Kusukume uNgqongqoshe wezokuHlaliswa kwaBantu uNksz Mmamoloko Kubayi, ekhala ngokuthi u-Adv Breytenbach, umsola ngokuthi walala noSimelane ukuze anyuselwe esikhundleni.
UNkk Mapisa-Nqakula umyalele ukuthi axolise u-Adv Breytenbach, kodwa wanqaba, wabe esemyalela ukuthi aphume.
Amalungu e-DA agcine esephuma naye.
Nelungu le-EFF uMnuz Mzwanele Manyi, libize amalungu e-ANC ngamasela, lathi ngeke lihlale lilalele amasela.
Uthe uyakuchitha ukuqokwa kuka-Adv Gcaleka ngoba akasifanele isikhundla.
UNkk Mapisa-Nqakula umyalele ukuthi ahoxise akushilo, kodwa wanqaba, wamyalela ukuthi akaphume.
Ugcine ephumile, wathi ngeke ahlale nosikhotheni.
U-Adv Gcaleka ubebambe njengomvikeli womphakathi emuva kokumiswa kobengumvikeli womphakathi u-Adv Busisiwe Mkhwebane, owachithwa yiPhalamende.