IGIXABEZWE ngodilikajele indoda eneminyaka engu-28 elahlwe ngecala lokudlwengula uninakhulu (70) eBlaaubosch, eNewcastle.
Lo mlisa ugwetshwe yiNkantolo yesiFunda yaseMadadeni ngoMsombuluko.
Okhulumela amaphoyisa KwaZulu-Natal, uConstable Thenjiswa Ngcobo ulandise wathi umgilwa wayekade ekwakhe ngo-Agasti 9 ngonyaka odlule ngesikhathi ecelwa umzukulu ukuthi amvulele isango.
“Wabe eseyalivula ugogo isango engasoli lutho, engazi ukuthi umzukulu uhlele ukumdlwengula. Wavula isango wase ephindela egumbini lakhe wayolala kanti umzukulu uzomlandela afike amdlwengule,” kuchaza uConst Ngcobo.
Uqhube wathi amaphoyisa ophiko oluphenya amacala athinta udlame lwasemindenini, ukuvikelwa kwezingane nathinta ucansi, asebenza ngokuzikhandla eqinisekisa ukuthi le ndoda iyaboshwa.
Kuthiwa igqigqe enkantolo kwaze kwaba ilahlwa yicala yanikwa isigwebo sikadilikajele.