NKOSIKHONA CELE
UMSAKAZI weMbokodo FM ongaconsi phansi kubalaleli, uMfu Bhelebane Bhele webandla iChosen Generation uzokuba nenkonzo yamazwi ayisikhombisa yamabandla ehlukene ngoMgqibelo.
Le nkonzo ezoqala ngehora leshumi ekuseni uyethe elokuthi yiNational Pre -Pass Over kanti izokuba senkundleni yezemidlalo yaseThekwini, iCurries Fountain.
Inhloso yayo enkulu uthe ukuhlanganisa amabandla ehlukene enze amazwi ayisikhombisa endawonye ngaphambi kokuba aye emabandleni awo.
Uthe ayikho into emqoka ngaphezulu kokubona amabandla ehlangene ndawonye.
"Inhloso enkulu yale nkonzo ukuhlanganisa amabandla ukuba enze ndawonye inkonzo yamazwi ayisikhombisa. Lokhu kubalulekile kakhulu. Kuzobasiza nalabo abangeke balithole ithuba lokuya ezinkonzweni zePhasika,'' usho kanje.
Uveze ukuthi kuzokube kungabefundisi abehlukene abazoshiyelana inkundla ngamazwi ayisikhombisa.
Phakathi kwabo ngoMphostoli Sandile Msimang webandla iThy Will Ministries, Mfu Zweli Dlamini we-Apostolic Faith Mission in South Africa (AFMSA), Mbhishobhi Thanda Zulu we-Utterance of His Voice Bible Church International, Mphostoli PD Ngcobo weCity Church Intenational, noMbhishobhi BM Buthelezi weRestoration and Worship Centre International (RWCI).
Minyaka yonke lo msakazi ujwayele ukuthi abe nalo luhlobo lwenkonzo. Ushayela uhlelo iChosen Genaration olungena njalo ngoMsombuluko kuya kuLwesithathu ngehora lesi-7h00 - 10h00.