KUPHAZAMISEKE ukusebenza esibhedlela sikahulumeni iChurch of Scotland esisoThukela, kuMasipala waseMsinga, amalungu omphakathi evuka indlobana, evala amasango ngezingidi zawo, eshisa namathayi emigwaqweni eyizintuba ezingenela kulesi sibhedlela, izolo ekuseni.
Lo mphakathi obuthukuthele ukhala ngamanzi okuthiwa sekuphele izinyanga ezintathu engabonwa kulesi sibhedlela, ukushoda kodokotela nokuqashwa kwabantu okungasibona abendawo.
Ikhansela kule ndawo, uMnuz Thokozani Sokhela, ebelikhona ngesikhathi kunalo mbhikisho, lithe belalela izikhalo zomphakathi, kuvelile ukuthi kuningi okungahambi kahle kulesi sibhedlela.
“Okokuqala nje amanzi awekho kanti sekuphele izinyanga kunale nkinga. Yebo, kunenkinga yamanzi kuMasipala waseMsinga, kodwa isibhedlela sinamapitsi aso esidonsa kuwo amanzi esatshelwa ukuthi afile, namanje awakalungiswa.
“Sekudingeka ukuthi uma abantu bezobheka amalungu emindeni yabo babaphathele amanzi ngezigubhu ezincane zokuthi umuntu akwazi ukugeza nokuphuza, okubeka engcupheni impilo yeziguli nabasebenzi ngenxa yesimo senhlanzeko,” usho kanje.
Uthe okunye okukhathaza umphakathi ukushoda kodokotela okugcina isiguli esingeniswe esibhedlela sesihlala isikhathi eside silindile. Uthe kukhalwa kakhulu nangokungaqashwa kwabantu basendaweni emisebenzini engafune zitifiketi, nangezinkampani ezenza imisebenzi esibhedlela okuthiwa ngezosomabhizinisi abavela ngaphandle.
“Kwabona labo somabhizinisi bafika nabantu babo, abaqashi khona lapha ngaphakathi. Umphakathi uthi awunankinga nabantu abasebenza ngokwezicucu zabo njengabahlengikazi, odokotela nakweminye imikhakha efundelwe. Okunye okubonakala kuxosha kakhulu odokotela yisona isimo samanzi, akekho udokotela ofisa ukusebenzela endaweni engenamanzi nengahlanzekile,” kusho uSokhela.
Uthe lishone elayizolo sebekhulumile nomphakathi ukudambisa isimo, kwavunyelwana ngokuthi incwadi yezikhalo izodluliselwa kwiziphathimandla namhlanje.
Omunye wabasebenzi okhulume neSolezwe ongavunyelwe ukukhuluma nabezindaba, ukuqinisekisile ukuthi isimo okusetshenzwa ngaphansi kwaso sibi kakhulu.
“Uma ungena emawadini lapho kulele iziguli kuyanuka phu ngoba amanzi awekho okwenza iningi leziguli lingagezi, kuze kusizakale lezo eziseduze namakhaya ngoba abakubo bezilethela amanzi. Sesisabela ukuhaqwa amagciwane, selokhu amanzi agcina ukubakhona ngoMeyi.
Kushicilelwe uMnyango wezeMpilo eKZN ubungakaphenduli ngalesi simo nesigameko.