UMNDENI kaMntwana uMangosuthu Buthelezi odlule emhlabeni izolo ekuseni, uhlangene manje neqembu lakhe Inkatha Freedom Party. Inhloso yalo mhlangano ukuvumelana ngosuku lokumfihla kanjalo nosuku lwenkonzo yesikhumbuzo.
Izindaba esizitholayo ngomthombo weSolezwe Online kodwa ezingaqinisekisiwe zithi, okunye okudingidwa njengamanje kulo mhlangano, indaba yokusungula ikomiti elizosingatha konke ngomngcwabo kanjalo nenkonzo yesikhumbuzo. Kuvela ukuthi leli komiti lizohlanganisa amalungu omndeni, awe-IFP, uhulumeni namaphoyisa.
Okwamanje kusalindwe lo mhlangano womndeni neqembu le-IFP okuyibona abazocacisa ukuthi kuzokwenzekani uma kusuka lana kuya phambili. Okukhona ukuthi abantu balokhu betheleke njalo emzini kaShenge ukuzozwakalisa amazwi enduduzo.