OBEYIPHINI lemeya kaMasipala weTheku nonguMengameli we-Abantu Batho Congress (ABC), uMnuz Philani “PG” Mavundla, useyiMeya kaMasipala uMvoti entsha, emuva kokukhethelwa esikhundleni ngoLwesithathu.
UMasipala uMvoti ubuphethwe yi-IFP ebijube uMnuz Zamani Malembe kwesemeya nokunguyena oketuliwe esikhundleni.
UMavundla ehlangene namanye amaqembu emkhandlwini, bavote ndawonye kwaba wukuphuma kwayo i-IFP emandleni.
UMavundla ungena kulesi sikhundla nje, wayeke wasiqhoqhobala phambilini. Waduma ngokuba yimeya eyanqaba umholo, wathi akawudingi ngoba yena uze ngokuzosebenzela abantu.
UMavundla ukhethwa kade esanda kungenela umbango wesikhundla sekhansela lewadi okhethweni lokuchibiyela kodwa wakhala ngaphansi, kwanqoba i-IFP.
UMavundla uke waba semshadweni ne-ANC eThekwini, wagcina ehlomula ngesikhundla sephini lemeya kodwa wangahlala kakhulu kusona, kwaba nengxabano nemeya bagcina bemchitha.