KUBOSHWE abanye abasolwa ababili ngecala lokubulawa kwabantu abangu-18 eNgobozane eLusikisiki.
Laba basolwa babanjwe emzini oseFlagstaff okuyindawo engekude neLusikisiki ngoLwesine ebusuku. Batholwe nezinhlokohlela zezibhamu okukholakala ukuthi yizona ezasetshenziswa kulobu bugebengu. Kulezi zibhamu bekukhona ama-AK47 automatic rifles amathathu ne-243 Steyr Mannlicher rifle.
Okhulumela amaphoyisa, uBrigadier Athlenda Mathe: "Uphenyo lokuqala lukhomba ukuthi izibhamu zithuthelwe kwenye indawo ngemuva kokubulawa kwabangu18 eLusikisiki. Kuboshwe abasolwa ababili ngokutholakala nalezi zibhamu."
Ukuboshwa kwalaba kubeka isibalo sababoshiwe kwesiyisikhombisa kulandela ukuboshwa kwabane kuleli sonto.
Abasolwa abathathu baboshwa emjondolo waseMkholombe, ePort Shepstone, owesine wabanjwa e-East London. Laba bazovela enkantolo yeMantshi eLusikisiki ngoLwesihlanu.