USOLA isiteshi uMzansi Magic nenkampani ekhiqiza uhlelo iOur Perfect Wedding, iConnect TV, owesifazane waseManguzi, ochashwe ngenhlamba ngemuva kokuvela kulolu hlelo enxusa umkhwenyana ukuthi athengele umakoti isiqholo esizomenza anuke kahle.
Lona wesifazane ogama lakhe uMavuyi Vuyi kuFacebook kodwa kulolu hlelo ubizwe ngoPromise Sithole, ukusho lokhu ngemuva kokuchashwa ngenhlamba abesifazane ekhasini elaziwa ngokuthi iLadies House enkundleni yokuxhumana uFacebook.
Ubekhuluma emshadweni kaNonkululeko noNjabulo Mkhumbuzi obekukhonjiswa umshado ngeSonto.
Kusuka ngeSonto ngemuva kwalolu hlelo inkulumo kaMavuyi idine abaningi njengoba athi kuyashisa ngakho kudingeka umakoti anuke kamnandi.
NgoLwesibili ngemuva kokuthola igama lalona wesifazane iningi limthelekele limbuza ukuthi kungani athunaza isithunzi somunye umuntu wesifazane.
Eziphendulela khona ezinkundleni zokuxhumana uthe, ababesemshadweni bayazi ukuthi wayethini.
“Babehleka umakoti nomkhwenyana ngesikhathi ngisho le nto kodwa kulolu hlelo babaveza sengathi badiniwe ukuze kudonseke amehlo abaningi futhi kube nokukhuluma. Kule nkulumo yami basusa okuningi bagqamisa lokhu okuvelile,” kubhala lona wesifazane.
Uthe izinhlelo zethelevishini ziyathanda ukunonga izinto ukuze zihehe zisuse nomsindo.
AbeMzansi Magic abayiphendulanga imiyalezo abathunyelelwe yona nge e-mail nemiqhafazo yileli phephandaba.